ଅମୃତସର: କରୋନା ପାଇଁ ଦେଶରେ ଲକଡାଉନ ଜାରି ହୋଇଛି। ଆସନ୍ତା ୩ ତାରିଖରେ ଏହା ଶେଷ ହେବ। ତେବେ ଆଜି ପଞ୍ଜାବ ସରକାର ଆସନ୍ତା ୨ ସପ୍ତାହ ପାଇଁ ରାଜ୍ୟରେ ଲକଡାଉନ ଅବଧିକୁ ବୃଦ୍ଧି କରିଛନ୍ତି। ଲକଡାଉନ ବୃଦ୍ଧି କରାଯାଇଥିଲେ ହେଁ ଏଠାରେ କର୍ଫ୍ୟୁ ଭଳି ନିୟମ ପାଳନ କରାଯିବ। ତେଣୁ ପଞ୍ଜାବ ସରକାର ୨ ସପ୍ତାହ ଯାଏ ରାଜ୍ୟରେ କର୍ଫ୍ୟୁ ଲଗାଇଥିବା କହିଛନ୍ତି।
ପଞ୍ଜାବ ମୁଖ୍ୟମନ୍ତ୍ରୀ କ୍ୟାପ୍ଟେନ ଅମରିନ୍ଦର ସିଂହ କହିଛନ୍ତି, କରୋନା ମହାମାରୀକୁ ଦୃଷ୍ଟିରେ ରଖି ରାଜ୍ୟରେ ୨ ସପ୍ତାହ ପାଇଁ କର୍ଫ୍ୟୁ ଲାଗୁ କରାଯାଉଛି। ଲକଡାଉନ ସହ କର୍ଫ୍ୟୁ କାର୍ଯ୍ୟକାରୀ ହେବ। ତେବେ କର୍ଫ୍ୟୁ ସମୟରେ ପ୍ରତିଦିନ ସକାଳ ୭ଟାରୁ ଦିନ ୧୧ଟା ଯାଏ କିଛି କୋହଳ ନୀତି ଅବଲମ୍ବନ କରାଯିବ।
ଆହୁରି ପଢ଼ନ୍ତୁ
ଲୋକମାନେ ସେମାନଙ୍କ ଆବଶ୍ୟକ ସାମଗ୍ରୀ କିଣିବା ସହ ଶିଳ୍ପ କାମ ଓ ବ୍ୟବସାୟ କରିପାରିବେ। ଏହି ସମୟରେ ମୁହଁରେ ମାସ୍କ ଓ ସାମାଜିକ ଦୂରତାକୁ କଡ଼ାକଡ଼ି ଭାବେ ପାଳନ କରାଯିବ। ପରବର୍ତ୍ତୀ ଅବସ୍ଥାରେ କରୋନା ସ୍ଥିତିକୁ ଦୃଷ୍ଟିରେ ରଖି ଲକଡାଉନ ଓ କର୍ଫ୍ୟୁ ଉପରେ ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି।
ବର୍ତ୍ତମାନ ସୁଦ୍ଧା ପଞ୍ଜାବରେ ୩୧୯ଟି କରୋନା ମାମଲା ସାମ୍ନାକୁ ଆସିଥିବା ବେଳେ ୧୯ ଜଣଙ୍କ ମୃତ୍ୟୁ ଘଟିଛି। ସେହିପରି ୭୧ ଜଣ ସୁସ୍ଥ ହୋଇ ଘରକୁ ଫେରିଛନ୍ତି।
