ସତ୍ୟଶିଖା (ଭୁବନେଶ୍ୱର) ୨୨/୦୧/୨୦୨୧ : କାହା ବାଇକ୍ରୁ ଢୋ ଢୋ… ସାଉଣ୍ଡ୍ ବାହାରୁଛି ତ ଆଉ କାହାର ଘୁଁ ଘୁଁ …। ତା’ ସାଙ୍ଗକୁ ଗାଡ଼ିର ପଛ ସିଟ୍(ପିଲିଅନ୍) ଟେକା । ମୁଣ୍ଡରେ ଦାମୀ ଓ ଷ୍ଟାଇଲ ହେଲମେଟ୍ ଓ ଦୁଇ ହାତରେ ବାଇକ୍ ଗ୍ଲୋଭ୍ସ । ଏମିତି ମାଳମାଳ ବାଇକ୍ ଏବେ ରାଜଧାନୀ ରାସ୍ତାରେ ରାଜୁତି କରୁଛନ୍ତି । ରାଜଧାନୀରେ ବାଇକ୍ ଚଢ଼ିବା ସଉକ ଏବେ ବଦଳି ଯାଇଛି । ୮/୧୦ ବର୍ଷ ପୂର୍ବରୁ ଗାଡ଼ି କେତେ ତେଲ(ମାଇଲେଜ୍) ଦେଖାଉଛି, ତାହା ଦେଖି ଲୋକ ଗାଡ଼ି କିଣୁଥିଲେ । ଏବେ କିନ୍ତୁ ପିକ୍ଅପ୍ । ତେଲ ଦର ଯେତେ ହେଲେ ମଧ୍ୟ ପରବାୟ ନାହିଁ । ସାଙ୍ଗ କି ଗର୍ଲଫ୍ରେଣ୍ଡକୁ ଷ୍ଟାଇଲିସ୍/ପିକ୍ଅପ୍ ବାଇକ୍ରେ ବସାଇ ରାଜଧାନୀ ଚକ୍କର କାଟିବା ଏବେ ଯୁବପିଢ଼ିଙ୍କ ପ୍ରଥମ ପସନ୍ଦ ପାଲଟିଛି ।
ଏହାକୁ ନଜରରେ ରଖି ରାଜଧାନୀରେ ମଧ୍ୟ ଅନେକ ନାମୀଦାମୀ ବାଇକ୍ ସୋ’ ରୁମ୍ ଖୋଲିଛି । ରୟାଲ ଏନଫିଲ୍ଡଠାରୁ ଆରମ୍ଭ କରି କେଟିଏମ୍, ସୁଜୁକି ଓ ଅନ୍ୟ କମ୍ପାନିର ଭିନ୍ନ ଭିନ୍ନ ଡିଜାଇନ୍ର ପିକ୍ଅପ୍ ବାଇକ୍ ଯୁବପିଢ଼ିଙ୍କୁ ଆକୃଷ୍ଟ କରୁଛି । ଆଗକୁ ମଧ୍ୟ ଏଭଳି ଗାଡ଼ିର ଚାହିଦା ବଢ଼ିବ ବୋଲି ଅନୁମାନ କରାଯାଉଛି । ଏହାସହ ବିଶ୍ବର ଅନେକ ନାମୀଦାମୀ ସ୍ପୋର୍ଟ୍ସ/ସୁପର ବାଇକ୍ ମଧ୍ୟ ଭୁବନେଶ୍ବରେ ଗଡ଼ୁଛି । ଏକାଧିକ ବାଇକର୍ ଗ୍ରୁପ୍ ମଧ୍ୟ ରହିଛନ୍ତି । ତେବେ ଏହା କିଛି ନିର୍ଦ୍ଦିଷ୍ଟ ଲୋକଙ୍କ ହାତରେ ସୀମିତ ରହିଛି ।
ବାଇକ୍ ଚଢ଼ିବାର ସଉକ ଏବେ ବଦଳି ଯାଇଛି । ସ୍ପିଡ୍ ବାଇକ୍ରେ ସ୍ପିଡ୍ରେ ଯିବା ସହିତ ସାପ ଭଳି ଅଙ୍କାବଙ୍କା ଢଙ୍ଗରେ ଗାଡ଼ି ଚଳାଇବା ଯୁବପିଢ଼ିଙ୍କ ଏକପ୍ରକାର ନିଶା ପାଲଟି ଗଲାଣି । ୧୫୦ ସିସିରୁ ଆରମ୍ଭ କରି ୨୫୦ ସିସି ପର୍ଯ୍ୟନ୍ତ ପିକ୍ଅପ୍ ଥିବା ବାଇକ୍ ଏଥିରେ ଆଗରେ ରହିଛି । ତେଣୁ ଏକାଧିକ ବାଇକ୍ କମ୍ପାନି ଏଭଳି ଗାଡ଼ି ତିଆରି ଉପରେ ଜୋର୍ ଦେଉଛନ୍ତି । କିଛି ବର୍ଷ ବ୍ୟବଧାନରେ ନୂଆ ନୂଆ ମେଡଲ ଛାଇଯାଉଛି ବଜାରରେ । ଏମିତିକି ଦୀର୍ଘ ବର୍ଷ ପୂର୍ବେ ଲୋକଙ୍କ ପ୍ରଥମ ପସନ୍ଦ ରହିଥିବା ରୟାଲ ଏନ୍ଫିଲ୍ଡ ବୁଲେଟ୍ ଓ ବନ୍ଦ ହୋଇଯାଇଥିବା ଜାୱା ଏବେ ନୂଆ ରୂପରେ ଫେରିଛି । ତେବେ ଏସବୁ ବାଇକ୍ ପାଇଁ ଅତି ସହଜରେ ଲୋନ୍ ମିଳି ଯାଉଥିବାରୁ ରାଜଧାନୀରେ ଅଧିକରୁ ଅଧିକ ବିକ୍ରି ହେଉଥିବା ଜଣାଯାଇଛି ।
ଚାହିଦାରେ ସୁଜୁକି ଜିକ୍ସର୍ ଓ କେଟିଏମ୍ର ୪ଟି ମଡେଲ୍
ସ୍ପିଡ୍ ବାଇକ୍ରେ ଆଗରେ ରହିଛି କେଟିଏମ୍ । ଖଣ୍ଡଗିରି କେଟିଏମ୍ ସୋ’ ରୁମ୍ର ମ୍ୟାନେଜର ଦେବାଶିଷ ନନ୍ଦୀଙ୍କ କହିବା ମୁତାବକ, କମ୍ପାନିର ୧୧ଟି ମଡେଲ ମଧ୍ୟରୁ ୪ଟି ମଡେଲ ଅଧିକ ବିକ୍ରି ହେଉଛି । କେଟିଏମ୍ ମୁଖ୍ୟତଃ ରେସିଂ ଗାଡ଼ି ହୋଇଥିବାରୁ ୧,୬୮,୧୦୦ ଟଙ୍କାରୁ ଗାଡ଼ି ଆରମ୍ଭ ହୋଇ ୩ ଲକ୍ଷ ୫୧ ହଜାର ୨୦୦ ଟଙ୍କା ପର୍ଯ୍ୟନ୍ତ ଗାଡ଼ିର ଦାମ୍ ରହିଛି । ଯୁବପିଢିଙ୍କ ପସନ୍ଦକୁ ନଜରରେ ରଖି ଚଳିତବର୍ଷ ବାଇକ୍ ନୂଆ ମଡେଲରେ ଡିଜାଇନ୍ ଓ ପାୱାର ଇଞ୍ଜିନ୍ କରାଯାଇଛି । ଯାହାକି ଯୁବପିଢ଼ିଙ୍କୁ ଆକୃଷ୍ଟ କରିବ ବୋଲି ସେ କହିଛନ୍ତି । ସୁଜୁକି ମଧ୍ୟ ଯୁବ/କଲେଜ ପଢ଼ୁଆଙ୍କୁ ନଜରରେ ରଖି ବଜାରକୁ ନୂଆ ବାଇକ୍ ଆଣିଛି । ସୁଜିକିର ଜିକ୍ସର ମଡେଲର ବାଇକ୍ ବେଶି ବିକ୍ରି ହେଉଛି ବୋଲି କହିଛନ୍ତି ସେଲ୍ସ ମ୍ୟାନେଜର୍ ଶାନ୍ତନୁ ମଜୁମଦାର । ବିଶେଷକରି କଲେଜ ପଢ଼ୁଆ ଛାତ୍ରମାନେ ଏହି ମଡେଲ ବାଇକ୍କୁ କିଣୁଛନ୍ତି ବୋଲି ସେ କହିଛନ୍ତି ।
ହୋଣ୍ଡାର ପ୍ରଥମ ପସନ୍ଦରେ ହରନେଟ୍
ହୋଣ୍ଡା ମଧ୍ୟ ପଛରେ ପଡ଼ି ନାହିଁ । ହୋଣ୍ଡା କମ୍ପାନି ବହୁ ନୂଆ ଦମଦାର୍ ବାଇକ୍ ବଜାରକୁ ଆଣିଛି । ଯୁବକମାନେ ମୁଖ୍ୟତଃ ଅଧିକ ସିସି ବିଶିଷ୍ଟ ଇଞ୍ଜିନ ସହ ଲୁକିଙ୍ଗ ଉପରେ ବେଶି ଫୋକସ୍ କରୁଥିବାରୁ କମ୍ପାନି ହରନେଟ ରାପସେଲ ଏଡିସନ ଓ ଡିଇଓ ରାପସେଲ ଏଡିସନ ବାଇକ୍ ବଜାରକୁ ଛାଡ଼ିଛି । ଏହାକୁ ଯୁବପିଢ଼ିଙ୍କ ବେଶି ପସନ୍ଦ ବୋଲି କହିଛନ୍ତି ବରମୁଣ୍ଡାସ୍ଥିତ ପିଜିଏଲ ସୋ ରୁମ୍ର ଜେନେରାଲ ମ୍ୟାନେଜର୍ ରାଜେଶ କେଡ଼ିଆ । ଏହାସହ ହୋଣ୍ଡା ୟୁନିକର୍ଣ୍ଣ, ହୋଣ୍ଡା ସିବିଆର ରିଲୋଡେଡ୍ ଭଳି ବାଇକ୍ ମଧ୍ୟ ଯୁବକଙ୍କ ପସନ୍ଦ ଥିବା ସେ କହିଛନ୍ତି ।
