ରାୟପୁର: ସୋଶାଲ ମିଡିଆରେ ଫେକ ଆକାଉଣ୍ଟ କରି ଲୋକଙ୍କୁ ଭୂଆଁ ବୁଲାଇବା ଏବେ ବେଶ ସହଜ ହୋଇଯାଇଛି। ୧୦ ହଜାର ଲୋକ ଫେସବୁକରେ ଅନୁସରଣ କରୁଥିବା ସୁନ୍ଦରୀ ନିଶା ଜିନ୍ଦଲ ଶେଷରେ ଜଣେ ପୁରୁଷ ବୋଲି ପ୍ରମାଣିତ ହୋଇଛି। ଏହି ବ୍ୟକ୍ତି ଜଣ ଫେସବୁକରେ ଜଣେ ସୁନ୍ଦର ଝିଅର ଫଟୋ ଦେଇ ନିଶା ଜିନ୍ଦଲ ନାଁରେ ଆକାଉଣ୍ଟ ଖୋଲିଥିଲେ।
ତେବେ କିଛି ଦିନ ହେଲା ସେ ଏହି ଆକାଉଣ୍ଟ ଜରିଆରେ ବିବାଦୀୟ ଓ ବିଷ ମଞ୍ଜି ବୁଣିଲା ବୋଲି ବୟାନ ଦେଇ ଚାଲିଥିଲେ। ଏହାକୁ ନେଇ ବିବାଦ ଉପୁଜିବାରୁ ପୁଲିସ୍ ନିଶା ଜିନ୍ଦଲଙ୍କୁ ଖୋଜିଥିଲା। କିନ୍ତୁ ନିଶା ଜିନ୍ଦଲଙ୍କୁ ଖୋଜି ଖୋଜି ପୁଲିସ୍ ରବି ପୂଜରାଙ୍କ ପାଖରେ ପହଞ୍ଚିଛି। ତା’କୁ ଗିରଫ କରିବା ପରେ ପୂରା ଘଟଣା ସାମ୍ନାକୁ ଆସିଛି।
ରବି ହିଁ ଫେସବୁକରେ ନିଶା ଜିନ୍ଦଲ ନାଁରେ ଆକାଉଣ୍ଟ ଖୋଲି ଲୋକଙ୍କୁ ବିଭ୍ରାନ୍ତ କରିବା ସହ ବିବାଦୀୟ ବୟାନ ଦେଇ ଚାଲିଥିଲା। ରବି ୧୧ ବର୍ଷ ହେଲା ଇଞ୍ଜିନିୟରିଂ ପରୀକ୍ଷା ଦେଇ ଚାଲିଛି। ହେଲେ ପାସ କରିପାରୁନାହିଁ।
ପୁଲିସ୍ର କହିବା ଅନୁଯାୟୀ, ୨୦୧୨ରୁ ସେ ନିଶା ଜିନ୍ଦଲ ନାଁରେ ଫେକ ଆକାଉଣ୍ଟ ଚଳାଇ ଆସୁଛନ୍ତି। କେବଳ ନିଶା ଜିନ୍ଦଲ ନୁହନ୍ତି, ପାକିସ୍ତାନ ଅଭିନେତ୍ରୀ ମାରିଆ ପାଶା ନାଁରେ ବି ସେ ଏକ ଫେକ ଆକାଉଣ୍ଟ ଖୋଲିଥିଲା।
ଆହୁରି ପଢ଼ନ୍ତୁ
ପୁଲିସ୍ ରବିକୁ ଗିରଫ କରିବା ପରେ ତା’ର ଫଟୋ ଉଠାଇଛି। ଏହି ଫଟୋକୁ ସୋଶାଲ ମିଡିଆରେ ପୋଷ୍ଟ ମଧ୍ୟ କରିଛି। ରବିକୁ ମଧ୍ୟ ନିଶା ଜିନ୍ଦଲ ଆକାଉଣ୍ଟରେ ଏହି ଫଟୋକୁ ପୋଷ୍ଟ କରିବାକୁ କହିଛି। ପୁଲିସ୍ର ନିର୍ଦ୍ଦେଶ ଅନୁସାରେ ରବି ଉକ୍ତ ଫଟୋକୁ ନିଶା ଜିନ୍ଦଲ ଆକାଉଣ୍ଟରେ ପୋଷ୍ଟ କରିଛି।
ଏଥିରେ ଲେଖାଯାଇଛି ଯେ ମୁଁ ନିଶା ଜିନ୍ଦଲ ଓ ମୁଁ ଏବେ ପୁଲିସ୍ ହେପାଜତରେ ରହିଛି। ମୁଖ୍ୟମନ୍ତ୍ରୀ ଭୂପେଶ ବାଘଲେ ପୁଲିସ୍ର ଏହି କାର୍ଯ୍ୟକୁ ପ୍ରଶଂସା କରିଛନ୍ତି। ସେ କହିଛନ୍ତି, ଲୋକଙ୍କୁ ଠକୁ ଥିବା କୌଣସି ଦୁର୍ବୃତ୍ତଙ୍କୁ ଛଡ଼ା ଯିବନାହିଁ। ଲୋକଙ୍କୁ ବିଭ୍ରାନ୍ତ କରୁଥିବା ସମସ୍ତ ଦୁର୍ବୃତ୍ତଙ୍କର ପର୍ଦ୍ଦାଫାସ କରାଯାଉ। ବଢ଼ିଆ କାମ କରିଛନ୍ତି ରାୟପୁର ପୁଲିସ।
୨୦୦୯ରୁ ରବି ସଫ୍ଟୱେର ଇଞ୍ଜିନିୟର ପଢ଼ୁଛି। ହେଲେ ଏଯାଏ ପାସ ହୋଇପାରିନାହିଁ। ସେ ସୋଶାଲ ମିଡିଆରେ ନିଜକୁ ଆଇଏମଏଫ, ବିଶ୍ୱ ସ୍ୱାସ୍ଥ୍ୟ ସଂଗଠନ ଓ ବିଶ୍ୱ ଶିଳ୍ପ ସଂଗଠନର ସଦସ୍ୟ ଭାବେ ପରିଚୟ ଦେଉଥିଲା।
ରବି ସୋଶାଲ ମିଡିଆରେ ସାଂପ୍ରଦାୟିକ ମନ୍ତବ୍ୟ ଦେବାରୁ ପୁଲିସ୍ ତା’କୁ ଧରିବାକୁ ଉଦ୍ୟମ କରିଥିଲା। ସାଇବର ସେଲ ଜରିଆରେ ଶେଷରେ ପୁଲିସ୍ ନିଶା ଜିନ୍ଦଲ ପାଖରେ ପହଞ୍ଚିଥିଲା। କିନ୍ତୁ ପ୍ରକୃତରେ ଏହା ପଛରେ ରବି ପୂଜାରା ହିଁ ରହିଥିଲା।
