ନୂଆଦିଲ୍ଲୀ: ଚଳିତ ବର୍ଷ ଫେବୃଆରୀ ମାସରେ ଦିଲ୍ଲୀରେ ସୃଷ୍ଟି ହୋଇଥିବା ସାଂପ୍ରଦାୟିକ ଦଙ୍ଗା ଘଟଣାରେ ଦିଲ୍ଲୀ ପୁଲିସ୍ ଚାର୍ଜଶିଟ ଦାଖଲ କରିଛି। ତେବେ ଏଥିରେ ବିଜେପି ନେତାମାନେ ଦଙ୍ଗା ପୂର୍ବରୁ ଘୃଣା ସୃଷ୍ଟି ପାଇଁ ଦେଇଥିବା ବୟାନକୁ ବାଦ ଦିଆଯାଇଛି। ସେହିପରି ନାଗରିକତା ସଂଶୋଧନ ଆଇନ(ସିଏଏ) ବିରୋଧରେ ଆନ୍ଦୋଳନ କରୁଥିବା ଲୋକଙ୍କୁ ପରୋକ୍ଷରେ ଦିଲ୍ଲୀ ଦଙ୍ଗା ପାଇଁ ଦାୟୀ କରାଯାଇଛି।
ଦିଲ୍ଲୀ ପୁଲିସ୍ ପୂରା ଦଙ୍ଗା ଘଟଣାରେ ୨ ହଜାର ପୃଷ୍ଠାର ଚାର୍ଜଶିଟ ଦାଖଲ କରିଛି। ଡିସେମ୍ବର ୧୩ରୁ ଫେବୃଆରୀ ୨୫ ଯାଏ କ୍ରୋନୋଲଜି ଅଫ ଇଭେଣ୍ଟ ସମ୍ପର୍କରେ ଦିଲ୍ଲୀ ପୁଲିସ ସମସ୍ତ ତଥ୍ୟ ଦେଇଛି। ହେଲେ ଏଥିରେ କୌଣସି ପ୍ରକାରର ବିଜେପି ନେତାଙ୍କ ଘୃଣା ସୃଷ୍ଟିକାରୀ ବୟାନ ସମ୍ପର୍କରେ କୁହାଯାଇ ନାହିଁ।
ଚାର୍ଜଶିଟରେ ସିଏଏ ବିରୋଧରେ ଶାହିନ ବାଗ ଓ ଅନ୍ୟାନ୍ୟ ସ୍ଥାନରେ ଏକାଠି ହୋଇଥିବା ଆନ୍ଦୋଳନକାରୀ, ଜାମିଆ ମିଲିଆ ଇସଲାମିଆ ବିଶ୍ୱବିଦ୍ୟାଳୟର ଛାତ୍ରଛାତ୍ରୀ ଓ ଅନ୍ୟ ଲୋକଙ୍କ ଭୂମିକା କଥା କୁହାଯାଇଛି।
ଆହୁରି ପଢ଼ନ୍ତୁ
ବିଜେପି ନେତା କପିଲ ମିଶ୍ରା ଫେବୃଆରୀ ୨୩ରେ ସିଏଏ ସପକ୍ଷରେ ଆନ୍ଦୋଳନ କରିଥିଲେ। ଦିଲ୍ଲୀର ମୌଜପୁର ଠାରେ ସେ ଅୟୋଜନ କରିଥିବା ରାଲିରେ ପୁଲିସ୍କୁ ସିଏଏ ବିରୋଧୀ ଆନ୍ଦୋଳନକାରୀଙ୍କୁ ହଟାଇବା ପାଇଁ ୨ ଦିନର ସମୟ ଦେଇଥିଲେ। ନହେଲେ ସେମାନେ ବି ରାସ୍ତାକୁ ଓହ୍ଲାଇବେ ବୋଲି କହିଥିଲେ। ଏହାପରେ ହିଁ ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଥିଲା।
ଧୀରେଧୀରେ ଏହି ଦଙ୍ଗା ଦିଲ୍ଲୀର ବିଭିନ୍ନ ସ୍ଥାନକୁ ବ୍ୟାପିଥିଲା। ଯେଉଁଥିରେ ୫୦ରୁ ଅଧିକ ଲୋକ ପ୍ରାଣ ହରାଇଥିଲେ। ଏହାବାଦ ବିଜେପି ନେତା ପରଭେଶ ବର୍ମା ଓ ଅନୁରାଗ ଠାକୁର ବି ଗୁଳି ମାରିବାକୁ ଲୋକଙ୍କୁ ଉସକାଇଥିବା ଅଭିଯୋଗ ହୋଇଥିଲା। ଏପରି କି ଦିଲ୍ଲୀ ହାଇକୋର୍ଟ ମଧ୍ୟ ଦଙ୍ଗା ପାଇଁ ଏପରି ଉତ୍ତେଜନା ସୃଷ୍ଟିକାରୀ ବୟାନକୁ ଦାୟୀ କରିବା ସହ କପିଲ ମିଶ୍ରା, ଅନୁରାଗ ଠାକୁ ଓ ପରଭେଶ ବର୍ମାଙ୍କ ବିରୋଧରେ ମାମଲା ରୁଜୁ କରିବାକୁ କହିଥିଲେ। ତଥାପି ଚାର୍ଜଶିଟରେ ବିଜେପି ନେତାଙ୍କ ବୟାନ ସମ୍ପର୍କରେ କିଛି ବି ସୂଚନା ଦିଆଯାଇନାହିଁ।
ବିଜେପିର ପୂର୍ବତନ ରାଷ୍ଟ୍ରୀୟ ଅଧ୍ୟକ୍ଷ ତଥା ବର୍ତ୍ତମାନର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ମଧ୍ୟ ପରୋକ୍ଷରେ ବିଜେପି ନେତାମାନେ ଦେଇଥିବା ଉତ୍ତେଜନା ସୃଷ୍ଟିକାରୀ ବୟାନକୁ ନିନ୍ଦା କରିଥିଲେ।
