ସତ୍ୟଶିଖା( ଭୁବନେଶ୍ୱର )୨୬.୧୦.୨୦୨୨: ରାଜ୍ୟରେ ଥିବା ବିଶ୍ୱବିଦ୍ୟାଳୟ ଏବଂ ଡିଗ୍ରୀ କଲେଜଗୁଡ଼ିକୁ ଯେପରି ‘ସେଣ୍ଟର ଅଫ୍ ଏକ୍ସିଲେନ୍ସି’ ବା ଉତ୍କର୍ଷ କେନ୍ଦ୍ରର ମାନ୍ୟତା ଦେବା ଲାଗି ଉଚ୍ଚଶିକ୍ଷା ବିଭାଗ ପକ୍ଷରୁ ପ୍ରୟାସ କରାଯାଉଛି, ସେହିପରି ସବୁ ଜୁନିୟର କଲେଜ ବା ଉଭୟ ଏକାଦଶ ଏବଂ ଦ୍ୱାଦଶ ଶ୍ରେଣୀକୁ ଉତ୍କର୍ଷ କେନ୍ଦ୍ରର ମାନ୍ୟତା ଦେବା ଲାଗି ସ୍କୁଲ ଓ ଗଣଶିକ୍ଷା ବିଭାଗ ପକ୍ଷରୁ ନିଷ୍ପତ୍ତି ହୋଇଛି । ଏହି ବ୍ୟବସ୍ଥା ଯଦି ଲାଗୁ କରାଯାଏ ତେବେ ସର୍ବଭାରତୀୟସ୍ତରରେ ଓଡ଼ିଶା ପ୍ରଥମ ରାଜ୍ୟର ମାନ୍ୟତା ହାସଲ କରିବ । ଡିଗ୍ରୀକଲେଜଗୁଡ଼ିକର ‘ସେଣ୍ଟର ଅଫ୍ ଏକ୍ସିଲେନ୍ସି’ ମାନ୍ୟତା ପରେ ୟୁଜିସି ଅନୁଦାନର ସହାୟକ ପାଉଥିବା ବେଳେ ଏକାଦଶ ଏବଂ ଦ୍ୱାଦଶ ଶ୍ରେଣୀ ଲାଗି ଯେଉଁ କଲେଜକୁ ‘ସେଣ୍ଟର ଅଫ୍ ଏକ୍ସିଲେନ୍ସି’ ମାନ୍ୟତା ମିଳିବ ସେହି ସବୁ କଲେଜ ଲାଗି ସମଗ୍ରଶିକ୍ଷା ଯୋଜନାରେ ମିଳୁଥିବା ଅନୁଦାନକୁ ବ୍ୟୟ କରାଯିବ । ଏହାବ୍ୟତୀତ ଆବଶ୍ୟକ ସ୍ଥଳେ ଗଣଶିକ୍ଷା ବିଭାଗ ପକ୍ଷରୁ ମଧ୍ୟ ସ୍ୱତନ୍ତ୍ର ଅନୁଦାନ ଯୋଗାଇ ଦିଆଯିବ ବୋଲି ନିଷ୍ପତ୍ତି ହୋଇଛି । ତେବେ ଏହି ବ୍ୟବସ୍ଥା ୨୦୨୦ରୁ ପ୍ରଚଳନ କରାଯିବ ବୋଲି ନିଷ୍ପତ୍ତି ହୋଇଥିଲେ ହେଁ ବିଭିନ୍ନ କାରଣ ଯୋଗୁଁ ତାହା କାର୍ଯ୍ୟକାରୀ ହୋଇପାରି ନଥିଲା ।
ଜୁନିୟର କଲେଜର ଭିତ୍ତିଭୂମି ଏବଂ ଗୁଣାତ୍ମକ ଶିକ୍ଷାଦାନ ଲାଗି ଗଣଶିକ୍ଷା ବିଭାଗ ପକ୍ଷରୁ ସର୍ବାଧିକ ଗୁରୁତ୍ୱ ଦିଆଯାଉଛି । ଘରୋଇ ଏବଂ ରେସିଡେନ୍ସିଆଲ୍ କଲେଜକୁ ବାଦ୍ ଦେଲେ କେବଳ ସରକାରୀ ଏବଂ ଅନୁଦାନପ୍ରାପ୍ତ କଲେଜଗୁଡ଼ିକୁ ଉତ୍କର୍ଷ କେନ୍ଦ୍ର କରିବାକୁ ଯୋଜନା ପ୍ରସ୍ତୁତ ହୋଇଛି । ରାଜ୍ୟରେ ୨୦୬୫ ଜୁନିୟର କଲେଜରୁ ପ୍ରଥମ ପର୍ଯ୍ୟାୟରେ ୫୦୦ କଲେଜକୁ ସାମିଲ କରାଯିବ । ପରେ ପର୍ଯ୍ୟାୟ କ୍ରମେ ୨୦୨୫ ସୁଦ୍ଧା ରାଜ୍ୟର ଜୁନିୟର କଲେଜକୁ ‘ସେଣ୍ଟର ଅଫ୍ ଏକ୍ସିଲେନ୍ସି’ ମଧ୍ୟରେ ରଖିବା ଲାଗି ଉଦ୍ୟମ କରାଯିବ । ତେବେ ପ୍ରଥମ ପର୍ଯ୍ୟାୟରେ ଯେଉଁ ସବୁ କଲେଜଗୁଡିକ ଏହି ‘ସେଣ୍ଟର ଅଫ୍ ଏକ୍ସିଲେନ୍ସି’ମାନ୍ୟତା ପାଇବେ ସେହି କଲେଜଗୁଡିକ ଲାଗି ସ୍ୱତନ୍ତ୍ର ବ୍ୟବସ୍ଥା କରାଯିବ । ଡିଜିଟାଲ କ୍ଲାସ ରୁମ୍, ପ୍ରୋଜେକ୍ଟର ବ୍ୟବସ୍ଥା, କ୍ୟାମ୍ପସରେ ୱାଏଫାଏ ସୁବିଧା, ମନିଟରିଂ ମେସେଜ୍ ବ୍ୟବସ୍ଥା, ଅତ୍ୟାଧୁନିକ ପ୍ରାକ୍ଟିକାଲ କକ୍ଷ ଆଦି ସୁବିଧା ରହିବ ।
‘ସେଣ୍ଟର ଅଫ୍ ଏକ୍ସିଲେନ୍ସି’ମାନ୍ୟତା ପାଇବା ଲାଗି ୧୧ଟି ମାନଦଣ୍ଡକୁ ଗୁରୁତ୍ୱ ଦିଆଯିବ । କଲେଜରେ ପିଲାଙ୍କ ଉପସ୍ଥାନ, ଅଧ୍ୟାପକ,ଅଧ୍ୟାପିକାଙ୍କ ସଂଖ୍ୟା, ଗତ ୫ବର୍ଷର ରେଜଲ୍ଟ, ବର୍ତ୍ତମାନର ଭିତ୍ତିଭୂମି ରୂପରେଖ, ଶିକ୍ଷାଦାନ ବ୍ୟବସ୍ଥା, ଅଧ୍ୟାପକଙ୍କ ଦକ୍ଷତା, ପ୍ରାକ୍ଟିକାଲ ରୁମ୍, ବାୟୋମେଟ୍ରିକ ବ୍ୟବସ୍ଥା ସାଙ୍ଗକୁ ପିଲାଙ୍କ ଲାଗି ମୌଳିକ ବ୍ୟବସ୍ଥା କ’ଣ ରହିଛି ତାକୁ ଅନୁଧ୍ୟାନ କରି ଏହ ମାନ୍ୟତା ଦିଆଯିବ । ତେବେ ଅନେକ କଲେଜ ଲାଗି ଅର୍ôଥକ ସମସ୍ୟା ରହିଛି । ମାତ୍ର ଯେଉଁ ସବୁ କଲେଜ ନିର୍ଦ୍ଧାରଣ ହୋଇଥିବା ମାନଦଣ୍ଡ ମଧ୍ୟରୁ ୫୦ପ୍ରତିଶତ ପୂରଣ କରୁଥିବ ତେବେ ସେହି କଲେଜକୁ ମଧ୍ୟ ତାଲିକାଭୁକ୍ତ କରାଯିବ ।
