ନୂଆଦିଲ୍ଲୀ: କରୋନା ଲଢ଼େଇ ଭିତରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ସରପଞ୍ଚମାନଙ୍କ ସହ ଆଲୋଚନା କରିଛନ୍ତି। ଆଜି ହେଉଛି ଜାତୀୟ ପଞ୍ଚାୟତରାଜ ଦିବସ। ଏଥିପାଇଁ ଆଜି ମୋଦି ଭିଡିଓ କନଫରେନ୍ସିଂ ଜରିଆରେ ସରପଞ୍ଚମାନଙ୍କ ସହ ଆଲୋଚନା କରି କରୋନା ଲଢ଼େଇର ସ୍ଥିତି ସମ୍ପର୍କରେ ପଚାରି ବୁଝିଛନ୍ତି।
କରୋନା ମାଡ଼ରେ ଦେଶର ଅର୍ଥନୀତି ସହ ଗ୍ରାମାଞ୍ଚଳରେ ବି ବ୍ୟବସାୟ ଠପ ହୋଇଯାଇଛି। ଗ୍ରାମାଞ୍ଚଳର ଅର୍ଥନୀତିକୁ ଆଗକୁ ନେବା ପାଇଁ ମୋଦି ଆଜି ସ୍ୱାମିତ୍ୱ ଯୋଜନା ଓ ଇ-ଗ୍ରାମ ଆପ ଲଞ୍ଚ କରିଛନ୍ତି। ମୋଦି କହିଛନ୍ତି, ପଞ୍ଚାୟତ ସଶକ୍ତ ହେଲେ, ଅର୍ଥନୀତି ସଶକ୍ତ ହୋଇପାରିବ। ସେହିପରି ଏହାର ପ୍ରଭାବ ଦେଶର ଅର୍ଥନୀତିକ ଅଭିବୃଦ୍ଧିରେ ବି ସହାୟକ ହେବ। ତେଣୁ ଗ୍ରାମାଞ୍ଚଳର ଅର୍ଥନୀତିକୁ ବୃଦ୍ଧି କରିବା ଆମର ଲକ୍ଷ୍ୟ ବୋଲି ସେ କହିଛନ୍ତି।
ସ୍ୱାମିତ୍ୱ ଯୋଜନା ଅଧୀନରେ ଗାଁରେ ଡ୍ରୋନ୍ ସହାୟତାରେ ଲୋକଙ୍କ ସଂପତ୍ତିର ମ୍ୟାପିଂ କରାଯିବ। ଏହାଦ୍ୱାରା ଲୋକଙ୍କୁ ସେମାନଙ୍କର ସଂପତ୍ତିର ମାଲିକାନା ସତ୍ତ୍ୱ ମିଳିପାରିବ। ଏହା ଫଳରେ ଗାଁରେ ଜମିବାଡ଼ି ବିବାଦ କମିବା ସହ ବ୍ୟାଙ୍କରୁ ଋଣ ମିଳିବା ସହଜ ହେବ ବୋଲି ମୋଦି କହିଛନ୍ତି।
ପ୍ରଥମ ପର୍ଯ୍ୟାୟରେ ଏହି ଯୋଜନାକୁ ୬ଟି ରାଜ୍ୟରେ ଲାଗୁ କରାଯିବ। ୬ଟି ରାଜ୍ୟରେ ପରୀକ୍ଷାମୂଳକ ଭାବେ ଲାଗୁ ପରେ ସାରା ଦେଶରେ ଏହାକୁ କାର୍ଯ୍ୟକାରୀ କରାଯିବ। ଏହି ପୋର୍ଟଲା ଦ୍ୱାରା ଲୋକମାନେ ବିନା କାଗଜ ପତ୍ରରେ ବି ଲୋକ ପାଇପାରିବେ।
ଆହୁରି ପଢ଼ନ୍ତୁ
ସେହିପରି ଇ-ଗ୍ରାମ ସ୍ୱରାଜ ପୋର୍ଟାଲ ଓ ମୋବାଇଲ ଆପର ମଧ୍ୟ ଆଜି ଶୁଭରାମ୍ଭ କରାଯାଇଛି। ପଞ୍ଚାୟତଗୁଡ଼ିକୁ ସଂପୂର୍ଣ୍ଣ ଡିଜିଟାଇଜେସନ କରିବା ପାଇଁ ଏହି ବ୍ୟବସ୍ଥା କରାଯାଇଛି। ପଞ୍ଚାୟତର ବିକାଶ ଓ ଆବଣ୍ଟିତ ପାଣ୍ଠି ଆଦି ସମସ୍ତ ତଥ୍ୟ ଏହି ପୋର୍ଟାଲରେ ରହିବ।
ଗାଁର ଯେ କୌଣସି ସାଧାରଣ ନାଗରିକ ପଞ୍ଚାୟତରେ କାର୍ଯ୍ୟକାରୀ ହେଉଥିବା ସରକାରୀ ଯୋଜନା ବିଷୟରେ ଏହି ଆପରୁ ଜାଣିପାରିବେ। ଏହାଦ୍ୱାରା ପଞ୍ଚାୟତର ସ୍ୱଚ୍ଛତା ଓ ଦକ୍ଷତା ବଢ଼ିପାରିବ ବୋଲି ମୋଦି କହିଛନ୍ତି।
ଗାଁ ମୁଖିଆଙ୍କ ସହ ଆଲୋଚନା କରିବା ବେଳେ ମୋଦି ନିଜ ପାଟି ଓ ନାକକୁ ଉତ୍ତରୀୟ ଦ୍ୱାରା ଘୋଡ଼ାଇ ରଖିଥିଲେ। ସେ ଆହୁରି କହିଛନ୍ତି, “କରୋନା ଲଢ଼େଇ ପାଇଁ ପ୍ରମୁଖ ଅସ୍ତ୍ର ହେଉଛି ସାମାଜିକ ଦୂରତା। ସହରାଞ୍ଚଳରେ ଏହାକୁ ସାମାଜିକ ଦୂରତା କୁହାଯାଉଥିବା ବେଳେ ଗ୍ରାମାଞ୍ଚଳର ଲୋକମାନେ ସମସ୍ତଙ୍କୁ ଦୋ ଗଜ କୀ ଦୂରୀ ମନ୍ତ୍ର ଦେଇଛନ୍ତି।
କରୋନା ଭାଇରସ ବିପର୍ଯ୍ୟୟ ଆମକୁ ଆତ୍ମନିର୍ଭଶୀଳ ହେବା ଶିଖାଇଛି। ଏଥିସହ ଆମେ କାହା ଉପରେ ନିର୍ଭର କରି ନ ଥାଉ ବୋଲି ପ୍ରମାଣିତ କରିଛି। ସହରବାସୀଙ୍କ ତୁଳନାରେ ଗାଁଗୁଡ଼ିକରେ କରୋନା ଭଳି ଜାତୀୟ ସ୍ୱାସ୍ଥ୍ୟ ସମସ୍ୟାକୁ ଅଧିକ ସଶକ୍ତ ଭାବେ ମୁକାବିଲା କରାଯାଇଛି। ତେଣୁ ଆମମାନଙ୍କୁ ଆପଣମାନଙ୍କ(ଗାଁ ମୁଖିଆ)ଠାରୁ ଅନେକ କିଛି ଶିଖିବାର ରହିଛି।
କରୋନା ଭାଇରସ ଯୋଗୁ ଆମେ ଅନେକ ଚ୍ୟାଲେଞ୍ଜର ସମ୍ମୁଖୀନ ହେଉଛେ। ଆଗକୁ ମଧ୍ୟ ଅନେକ ସମସ୍ୟାକୁ ସମ୍ମୁଖୀନ ହେବା। ଏଥିରେ ଡରି ନ ଯାଇ ଆମକୁ ଏହାର ମୁକାବିଲା କରିବାକୁ ହେବ। ଆମ ପାଖରେ ଉନ୍ନତ ଧରଣର ଟେକ୍ନୋଲଜି ରହିଛି। ସେହି ଟେକ୍ନୋଲଜି ଦ୍ୱାରା ଆଜି ଆମେମାନେ ଏକାଠି ବୈଠକ କରି ପାରୁଛେ।”
