ସତ୍ୟଶିଖା(ଭୁବନେଶ୍ୱର ) ୩୧.୦୮ .୨୦୨୧:ରାଜ୍ୟରେ ନିଅଣ୍ଟିଆ ମୌସୁମୀ ବର୍ଷା ଜାରି ରହିଛି । ଚାଷ ଜମି ଶୁଖି ପାଟିବାକୁ ବସିଲାଣି ହେଲେ ଏହି ସ୍ଥିତିରେ କେନାଲ୍ରେ ପର୍ଯ୍ୟାପ୍ତ ପାଣିନାହିଁ । ନଦୀ କୂଳିଆ ଅଞ୍ଚଳର କେତେକାଂଶରେ ଜୁଆର ପାଣି ପାଇଁ ଚାଷ କାର୍ଯ୍ୟ ଜାରି ରହିଛି । ହେଲେ ଏହାବାଦ୍ ବି ରାଜ୍ୟର ଲକ୍ଷ ଲକ୍ଷ ହେକ୍ଟର ଜମିରେ ଚାଷ କାର୍ଯ୍ୟ ଆଗେଇ ପାରୁ ନ ଥିବା ନଜରକୁ ଆସୁଛି । ଭାଦ୍ରବ ମାସରେ ଆକାଶରୁ ପାଣି ବଦଳରେ ଅଗ୍ନି ବର୍ଷୁଛି । ଫଳରେ ଧାନ ତଳି ନଷ୍ଟ ହେବାକୁ ବସିଲାଣି । ନିରୁପାୟ ହୋଇ ଚାଷୀମାନେ ମୁଣ୍ଡରେ ହାତ ଦେଇ ବସିଛନ୍ତି । ବଡ଼ କଥା ହେଲା ଆସନ୍ତା ୪ ତାରିଖ ଯାଏଁ ରାଜ୍ୟକୁ ଭାରି ବର୍ଷା ନାହିଁ । ୪ ତାରିଖ ଦିନ ହୁଏତ ରାଜ୍ୟର ୫ ଜିଲ୍ଲାରେ ବର୍ଷା ପରିମାଣ ଅଧିକ ରହିପାରେ । କିନ୍ତୁ ୫ ତାରିଖଠାରୁ ବର୍ଷାର ପରିମାଣ ବଢ଼ିବ ବୋଲି ପାଣିପାଗ ବିଶେଷଜ୍ଞ ତଥା ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶକ ଏଚ୍ ଆର୍ ବିଶ୍ୱାସ କହିଛନ୍ତି ।
ଶ୍ରୀ ବିଶ୍ୱାସଙ୍କ ସୂଚନା ମୂତାବକ, ରାଜ୍ୟରେ ଏବେ ସୁଦ୍ଧା ୬୪୯.୭ ମିମି ବର୍ଷା ରେକର୍ଡ ହୋଇଛି । ଏହା ସ୍ୱାଭାବିକ ବର୍ଷାଠୁ ୨୯% କମ୍ ରହିଛି । ଜୁନ୍ ପହିଲାରୁ ଏବେ ସୁଦ୍ଧା ରାଜ୍ୟରେ ୯୨୧ ମିମି ସ୍ୱାଭାବିକ ବର୍ଷା ରେକର୍ଡ ହେବା କଥା । ଖାଲି ଅଗଷ୍ଟରେ ହିଁ ୪୬% ଅଭାବୀ ବର୍ଷା କେରର୍ଡ ହୋଇଛି । ଅଗଷ୍ଟ ପହିଲାରୁ ୩୦ ତାରିଖ ମଧ୍ୟରେ ସ୍ୱାଭାବିକ ବର୍ଷା ୩୭୮.୭ ମିମି ହେବା କଥା । ହେଲେ ଏହି ସମୟ ପରିଧି ମଧ୍ୟରେ ୧୯୩.୪ ମିମି ବର୍ଷା ହୋଇଛି । ନିକଟ ଅତୀତରେ ହୋଇଥିବା ଲଘୁଚାପ ସକାଶେ ଅଗଷ୍ଟରେ ଅଭାବୀ ବର୍ଷା ପରିମାଣ ସାମାନ୍ୟ ଖସିଛି । ନଚେତ୍ ଜୁନ୍ ଓ ଜୁଲାଇରେ ରାଜ୍ୟରେ ସ୍ୱାଭାବିକ୍ ବର୍ଷା ରେକର୍ହ ହୋଇଥିଲା । ଅଗଷ୍ଟ ପାଇଁ ଅଭାବୀ ବର୍ଷା ପରିମାଣ ବଢ଼ିଛି ବୋଲି ଶ୍ରୀ ବିଶ୍ୱାସ କହିଛନ୍ତି ।
ମୌସୁମୀ ଜନିତ ନିମ୍ନଚାପରେଖା ଏବେ ମଧ୍ୟ ରାଜସ୍ଥାନର ବିକାନେରରୁ ବାହାରି ଅଜମେର, ଶିଭ୍ପୁରୀ ହୋଇ ଲଘୁଚାପ କ୍ଷେତ୍ରର ମଧ୍ୟବର୍ତ୍ତି ଅଞ୍ଚଳ ଯାଏ ପଡ଼ିଛି । ଯାହାକି ଏବେ ଛତିଶଗଡ଼ ଓ ତାର ଆଖପାଖ ଅଞ୍ଚଳରେ ସକ୍ରିୟ ରହିଛି । ଯାହାଫଳରେ ରାଜ୍ୟର ସମସ୍ତ ଜିଲ୍ଲାରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । ତେବେ ରାଜ୍ୟର ୫ ଜିଲ୍ଲାରେ ଏବେ ସ୍ୱାଭାବିକ ବର୍ଷା ରେକଡଁ ହୋଇଛି । ଯେଉଁଠି ବର୍ଷା ପରିମାଣ ୦ରୁ -୧୯% ମଧ୍ୟରେ ରହିଛି । ଏହାବାଦ୍ ୪ ଜିଲ୍ଲାରେ ସ୍ଥିତି ସବୁଠୁ ସଙ୍ଗିନ୍ ରହିଛି । ଯେଉଁଠି ୪୦%ରୁ ଅଧିକ ନିଅଣ୍ଟ ବର୍ଷା ହୋଇଛି । ଯାଜପୁରରେ ସର୍ବାଧିକ ୫୬% ନିଅଣ୍ଟ ବର୍ଷା ରେକର୍ହ କରାଯାଇଥିବାବେଳେ ଭଦ୍ରକରେ ୪୯%, ବଲାଙ୍ଗୀରରେ ୪୫% ଓ ଅନୁଗୁଳରେ ୪୦% ନିଅଣ୍ଟ ବର୍ଷା ରେକର୍ଡ ହୋଇଛି । ବାକି ୨୧ ଜିଲ୍ଲାରେ ନିଅଣ୍ଟ ବର୍ଷା ପରିମାଣ ୨୦%ରୁ ୪୦% ମଧ୍ୟରେ ରହିଥିବା ଶ୍ରୀ ବିଶ୍ୱାସ କହିଛନ୍ତି ।
ସୂଚନାଥାଉ କି, ସେପ୍ଟେମ୍ବର ୭ ତାରିଖ ବେଳକୁ ଆଉ ଏକ ଲଘୁଚାପ ସଷ୍ଟି ହେବା ସମ୍ଭାବନା ଅଛି । ସେପ୍ଟେମ୍ବର ୫ରେ ଉତ୍ତର ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇପାରେ । ଯାହାକି ପରବର୍ତ୍ତୀ ୪୮ ଘଣ୍ଟା ମଧ୍ୟରେ ଏକ ଲଘୁଚାପରେ ପରିଣତ ହେବ । ଯାହାଫଳରେ ରାଜ୍ୟରେ ବର୍ଷାର ପରିମାଣ ବୃଦ୍ଧିପାଇବା ସମ୍ଭାବନା ରହିଛି । ଅବଶ୍ୟ ଲଘୁଚାପର ପ୍ରଭାବ ଓଡ଼ିଶା ଅପେକ୍ଷା ଆନ୍ଧ୍ର ଓ ତେଲଙ୍ଗାନାକୁ ଅଧିକ ରହିବ । ତା ସତ୍ତ୍ୱେ ମଧ୍ୟ ଓଡ଼ିଶାର କିଛି ଜିଲ୍ଳାରେ ବର୍ଷା ପରିମାଣ ବଢ଼ିବା ସମ୍ଭାବନା ଅଧିକ ରହିଥିବା ପୂର୍ବନୁମାନ କରାଯାଇଛି ।
