ଗ୍ୟାଙ୍ଗଷ୍ଟର ବିକାଶ ଦୁବେର ଆଉ ଦୁଇ ସହଯୋଗୀଙ୍କୁ ଏନକାଉଣ୍ଟର

କାନପୁର: ଉତ୍ତର ପ୍ରଦେଶ କାନପୁର ଶୁଟଆଉଟର ମୁଖ୍ୟ ଅଭିଯୁକ୍ତ ଗ୍ୟାଙ୍ଗଷ୍ଟର ବିକାଶ ଦୁବେର ଆଉ ଦୁଇ ସହଯୋଗୀ ପୁଲିସ୍‌ ଗୁଳିରେ ନିହତ ହୋଇଛନ୍ତି। ମୃତକ ଦ୍ୱୟ ହେଲେ ରଣବୀର ଶୁକ୍ଳା ଓ ପ୍ରଭାତ ମିଶ୍ରା। ବୁଧବାର ପୁଲିସ୍‌ ବିକାଶର ପୁତୁରା ଅମର ଦୁବେକୁ ଗୁଳି କରିବା ସହ ୩ ଜଣଙ୍କୁ ଗିରଫ କରିଥିଲା।

ଆଜି ନିହତ ହୋଇଥିବା ପ୍ରଭାତ ମିଶ୍ରାକୁ ପୁଲିସ୍‌ ଫରିଦାବାଦ ସ୍ଥିତ ଗୋଟିଏ ହୋଟେଲରୁ ଗିରଫ କରିଥିଲା। ଏଠାରେ ବିକାଶ ଦୁବେ ମଧ୍ୟ ରହୁଥିଲା। ହେଲେ ପୁଲିସ୍‌ ଆସିବା ପୂର୍ବରୁ ଖସି ଚାଲି ଯାଇଥିଲା। ପୁଲିସ୍‌ ପ୍ରଭାତକୁ ଗିରଫ କରିଥିଲେ ହେଁ ସେ ଆଜି ଖସି ଯିବାକୁ ଉଦ୍ୟମ କରିଥିଲା। ଫଳରେ ପୁଲିସ୍‌ ତା’କୁ ଗୁଳି କରିଦେଇଛି।

ସେହିପରି ଇଟାୱାରେ ପୁଲିସ୍‌ ରଣବୀର ଶୁକ୍ଳାକୁ ଏନକାଉଣ୍ଟର କରିଛି। ପୁଲିସର ସୂଚନା ଅନୁଯାୟୀ, ରଣବୀର ମାହେୱା ଜାତୀୟ ରାଜପଥରୁ ଗୋଟିଏ ସୁଫିଟ୍‌ ଡିଜାୟର ଗାଡ଼ି ଲୁଟ କରିଥିଲା। ତା’ ସହ ଏହି ଲୁଟ ଘଟଣାରେ ଆଉ ୩ ଜଣ ରହିଥିଲେ। ପୁଲିସ୍‌ ଲୁଟ୍‌ ସମ୍ପର୍କରେ ଖବର ପାଇବା କ୍ଷଣି ସର୍ଚ୍ଚ ଅପରେସନ କରିଥିଲା।

ଏହି ସମୟରେ ରଣବୀର ପୁଲିସ୍‌କୁ ଗୁଳି କରିଥିଲା। ପୁଲିସ୍‌ ମଧ୍ୟ ଏହାର ଜବାବ ଦେଇଥିଲା। ଗୁଳି ବିନିମୟ ସମୟରେ ରଣବୀର ପ୍ରାଣ ହରାଇଛି। ତେବେ ଅନ୍ୟ ୩ ଜଣ ସେଠାରୁ ଖସି ଯିବାକୁ ସକ୍ଷମ ହୋଇଛନ୍ତି। ରଣବୀର ପୁଲିସ୍‌ ପାଇଁ ମୋଷ୍ଟୱାଣ୍ଟେଡ ଥିଲା। ଏଥିପାଇଁ ତା’ ମୁଣ୍ଡ ଉପରେ ୫୦ ହଜାର ଟଙ୍କାର ପୁରସ୍କାର ଲାଗିଥିଲା।