ସତ୍ୟଶିଖା ୨୬.୦୭.୨୦୨୦ ଭୁବନେଶ୍ୱର : ଅବସର ଗ୍ରହଣ କରୁଥିବା କର୍ମଚାରୀମାନଙ୍କୁ ସମ୍ବର୍ଦ୍ଧିତ କରିବା ପାଇଁ ଓ ସେମାନଙ୍କର ଅବଦାନକୁ ସମ୍ମାନ ଜଣାଇବା ପାଇଁ କାରଖାନା ଓ ଉତ୍ପାଦନ ୟୁନିଟ ସହିତ ମଣ୍ଡଳସ୍ତରରୁ ଆରମ୍ଭ କରି ରେଳ ବୋର୍ଡ ସ୍ତର ପର୍ଯ୍ୟନ୍ତ ରେଳପଥର ପ୍ରତ୍ୟେକ ୟୁନିଟରେ ପ୍ରତ୍ୟେକ ମାସର ଶେଷ ଦିନରେ ଗୋଟିଏ ଉତ୍ସବର ଆୟୋଜନ କରାଯାଉଛି । ତେବେ, ଏହି ଉତ୍ସବରେ କୋଭିଡ-19 ର ସଂକ୍ରମଣକୁ ଦୃଷ୍ଟିରେ ରଖି ଜନସମାବେଶ କରାଯାଉ ନାହିଁ ।
କୋଭିଡ-19 କୁ ପ୍ରତିହତ କରିବା ପାଇଁ ଏହି ଉତ୍ସବଗୁଡିକୁ ଭର୍ଚୁଆଲ ରୂପରେ ପାଳନ କରିବା ନିମନ୍ତେ ନିଷ୍ପତ୍ତି ନିଆଯାଇଛି । ବର୍ତ୍ତମାନ, ସର୍ବଭାରତୀୟ ସ୍ତରରେ ଏହି ଅବସର ଗ୍ରହଣ ଉତ୍ସବ ଗୁଡିକୁ ପ୍ରତ୍ୟେକ ମାସର ଅନ୍ତିମ କାର୍ଯ୍ୟ ଦିବସର ସନ୍ଧ୍ୟା 5 ଘଟିକା ସମୟରେ ଭିଡିଓ କନଫରେନ୍ସିଂରେ ପାଳନ କରାଯିବ ।
ଭିଡିଓ ଲିଙ୍କ୍ ଦ୍ଵାରା ଜୋନାଲ ରେଳପଥ, ମଣ୍ଡଳ, ଉତ୍ପାଦନ ୟୁନିଟ, କାରଖାନା ଗୁଡିକୁ ରେଳବାଇ ବୋର୍ଡ ସହିତ ସଂଯୋଗ କରାଯିବ । ଭିଡ଼ିଓ କନଫରେନ୍ସିଂ ସ୍ଥଳରେ ସମସ୍ତ ପ୍ରକାର ସତର୍କତା ଅବଲମ୍ବନ କରାଯିବ ଓ ସାମାଜିକ ଦୂରତ୍ୱକୁ କଡାକଡି ଭାବେ ପାଳନ କରାଯିବ ।
ଏହି ଅବସର ଗ୍ରହଣ ଉତ୍ସବରେ ମାନ୍ୟବର କେନ୍ଦ୍ର ରେଳ ମନ୍ତ୍ରୀ ଓ ରେଳ ରାଷ୍ଟ୍ରମନ୍ତ୍ରୀ ମଧ୍ୟ ଭିଡ଼ିଓ କନଫରେନ୍ସିଂ ଲିଙ୍କ ମାଧ୍ୟମରେ ଯୋଗ ଦେଇ ଅବସର ନେଉଥିବା ରେଳ କର୍ମଚାରୀମାନଙ୍କୁ, ଏହି ମହାନ୍ ଅନୁଷ୍ଠାନ ପାଇଁ ସେମାନଙ୍କର ଉତ୍ସର୍ଗୀକୃତ ଅବଦାନ ନିମନ୍ତେ ଧନ୍ୟବାଦ ଅର୍ପଣ କରିବେ ।
