ମୁମ୍ବାଇ: ୪୭ ବର୍ଷ ତଳେ ଅର୍ଥାତ୍ ୧୯୭୩ ମସିହାରେ ଆଜିର ଦିନରେ (ଜୁନ୍ ୩ରେ) ବାହା ହୋଇଥିଲେ ଅମିତାଭ ବଚ୍ଚନ। ଅଭିନେତ୍ରୀ ଜୟା ଭାଦୁରୀଙ୍କୁ ସେ ଜୀବନସାଥୀ ଭାବେ ଗ୍ରହଣ କରିଥିଲେ। ବାହାଘରର ୪୭ ବର୍ଷ ଉପଲକ୍ଷେ ବିଗ୍ ବି’ ତାଙ୍କ ଇନ୍ଷ୍ଟାଗ୍ରାମ୍ ଆକାଉଣ୍ଟରେ କିଛି ଫଟୋ ପୋଷ୍ଟ କରିବା ସହିତ ଏକ ସିକ୍ରେଟ୍ ଶେଆର କରିଛନ୍ତି। ଏହି ସିକ୍ରେଟ୍ ତାଙ୍କ ବାହାଘରକୁ ନେଇ।
ଆପଣମାନେ ତ ଜାଣିଥିବେ ତାଙ୍କର ସୁପରହିଟ୍ ଫିଲ୍ମ ‘ଜଞ୍ଜିର’ ୧୯୭୩ରେ ରିଲିଜ୍ ହୋଇଥିଲା। ତେବେ ଫିଲ୍ମ ରିଲିଜ୍ ହେବା ପୂର୍ବରୁ ଅମିତାଭ ଯୋଜନା କରିଥିଲେ ଯେ ଯଦି ଫିଲ୍ମଟି ହିଟ୍ ହେବ, ତା’ହେଲେ କିଛି ବନ୍ଧୁଙ୍କ ସହିତ ଲଣ୍ଡନ ବୁଲିବାକୁ ଯିବେ। ଏ ଯୋଜନା ସଂପର୍କରେ ସେ ତାଙ୍କ ବାପା ହରିବଂଶ ରାୟବଚ୍ଚନଙ୍କୁ ଜଣାଇଥିଲେ। ଆଉ ତାଙ୍କ ବାପା କ’ଣ କହିଥିଲେ, ସେ ବିଷୟରେ ବିଗ୍ ବି ତାଙ୍କ ଇନ୍ଷ୍ଟାଗ୍ରାମ ଆକାଉଣ୍ଟରେ ଲେଖିଛନ୍ତି।
ଆହୁରି ପଢ଼ନ୍ତୁ
ଅମିତାଭ ଲେଖିଛନ୍ତି ଯେ ତାଙ୍କ ବାପା ଲଣ୍ଡନ ବୁଲିଯିବା କଥା ଶୁଣି ତାଙ୍କ ସହିତ କିଏ କିଏ ଯିବେ ବୋଲି ଜାଣିବାକୁ ଚାହିଁଥିଲେ। ଆଉ ସେ ଜୟାଙ୍କ ନାଁ କହିବା ପରେ ତାଙ୍କ ବାପା କହିଥିଲେ ଯେ ସେଥିପାଇଁ ତାଙ୍କୁ ପ୍ରଥମେ ବାହା ହେବାକୁ ପଡ଼ିବ। ନହେଲେ ସେମାନେ ସାଙ୍ଗ ହୋଇ ଲଣ୍ଡନ ଯାଇପାରିବେନି। ଆଉ ଏହା ପରେ ଅମିତାଭ ତାଙ୍କ ବାପାଙ୍କ କଥା ମାନି ଜୟାଙ୍କୁ ବାହା ହୋଇଥିଲେ।
ସୂଚନାଯୋଗ୍ୟ, ଅମିତାଭ ଓ ଜୟା ‘ଜଞ୍ଜିର’, ‘ଅଭିମାନ’, ‘ଚୁପ୍କେ ଚୁପ୍କେ’, ‘ମିଲି’ ଓ ‘ଶୋଲେ’ ଭଳି ଅନେକ ଫିଲ୍ମରେ ଏକାଠି କାମ କରିଛନ୍ତି।
