କୁଖ୍ୟାତ ଗ୍ୟାଙ୍ଗଷ୍ଟର ବିକାଶ ଦୁବେ ପୁଲିସ୍ ଗୁଳିରେ ନିହତ!


କାନପୁର: ଯାହା ଆଶା କରାଯାଉଥିଲା ସେଇଆ ହିଁ ହେଲା। ପୁଲିସ୍ ଦ୍ୱାରା ଗତକାଲି ଗିରଫ ହୋଇଥିବା କୁଖ୍ୟାତ ଗ୍ୟାଙ୍ଗଷ୍ଟର ତା’ର ଅପରାଧ ସାମ୍ରାଜ୍ୟର ଗୁମର ଖୋଲିବା ପୂର୍ବରୁ ପୁଲିସ୍ ଗୁଳିରେ ପ୍ରାଣ ହରାଇଛି। ଗୁରୁବାର ମଧ୍ୟପ୍ରଦେଶର ଉଜୈନର ଏକ ମନ୍ଦିରରୁ ବିକାଶକୁ ଗିରଫ କରାଯାଇଥିଲା।
ଆଜି ଉତ୍ତର ପ୍ରଦେଶ ଏସଟିଏଫ ତା’କୁ କାନପୁର ଆଣିଥିଲା। ତେବେ ସେ କାନପୁର ଆସିବା ବାଟରେ ପୁଲିସ୍ର ଗାଡ଼ି ଦୁର୍ଘଟଣାଗ୍ରସ୍ତ ହୋଇଥିଲା। ଏହାର ସୁଯୋଗ ନେଇ ସେ ଖସିଯିବାକୁ ଚେଷ୍ଟା କରିଥିଲା। ତେଣୁ ପୁଲିସ୍ ତା’କୁ ଏନକାଉଣ୍ଟର କରିଥିବା କୁହାଯାଇଛି।
ଗୁଳିମାଡ଼ ହେବା ପରେ ବିକାଶକୁ ହସ୍ପିଟାଲ ନିଆଯାଉଥିବା ବେଳେ ତା’ର ମୃତ୍ୟୁ ଘଟିଛି। ପ୍ରାଥମିକ ସୂଚନା ଅନୁଯାୟୀ, ବିକାଶର ମୃତଦେହ ଏବେ ଲାଜପଥ ରାୟ ହସ୍ପିଟାଲରେ ରହିଛି। ଏଠାରେ ପୁଲିସ୍ ଓ ଡାକ୍ତରୀ ଟିମ ଉପସ୍ଥିତ ରହିଛନ୍ତି।
ଆହୁରି ପଢ଼ନ୍ତୁ
ଜୁନ୍ ୩ରେ କାନପୁରରେ ବିକାଶ ଓ ତା’ର ସହଯୋଗୀମାନେ ଆଖିବୁଜା ଗୁଳିମାଡ଼ କରି ୮ ଜଣ ପୁଲିସ୍ କର୍ମଚାରୀଙ୍କୁ ଅତ୍ୟନ୍ତ ଭୟଙ୍କର ଢଙ୍ଗରେ ହତ୍ୟା କରିଥିଲେ। ସେବେଠାରୁ ପୁଲିସ୍ ବିକାଶକୁ ଖୋଜୁଥିଲା। ବିକାଶକୁ ଖୋଜିବା ବେଳେ ପୁଲିସ୍ ତା’ର ୩ ଜଣ ସହଯୋଗୀଙ୍କୁ ଏନକାଉଣ୍ଟର କରିଥିଲା। ଏବେ ବିକାଶର ମଧ୍ୟ ସମାନ ଅବସ୍ଥା ଘଟିଛି।
ତେବେ ଏ ସମ୍ପର୍କରେ ଏଯାଏ ବିସ୍ତୃତ ସୂଚନା ମିଳିନାହିଁ। ବିକାଶ ନାଁରେ ୬୦ରୁ ଅଧିକ ମାମଲା ରହିଛି। ତା’କୁ ଧରିବା ପାଇଁ ପୁଲିସ୍ ୨୦ଟି ଟିମ ଗଠନ କରିଥିଲା। ଏକାଧିକ ପୁଲିସ୍ କର୍ମଚାରୀ ଓ ରାଜନେତାଙ୍କ ସହ ବିକାଶର ସମ୍ପର୍କ ରହିଥିଲା। ସେ ଗିରଫ ହୋଇଥିବାରୁ ସବୁ ଗୁମର ଖୋଲିବାର ସମ୍ଭାବନା ସୃଷ୍ଟି ହୋଇଥିଲା। କିନ୍ତୁ ଏସଟିଏଫ ତା’କୁ ଏନକାଉଣ୍ଟର କରି ଦେଇଛି।
ଆହୁରି ପଢ଼ନ୍ତୁ
[ad_2]