ମୁମ୍ବାଇ: “ଅବ୍ ସାରେ ବନ୍ଧନ୍ ତୋଡ୍କେ, ୟାଦୋଁକୋ ତନ୍ହା ଛୋଡ୍ କେ, ମେଁ ଗମ୍ ସେ ରିସ୍ତା ଯୋଡ୍ କେ ଯାଉଁ କାହାଁ ?” ଇରଫାନ ଖାନଙ୍କ ଫିଲ୍କ ‘ବିଲୁ’ର ଏହି ଗୀତଟି ଆପଣ ଶୁଣିଥିବେ ନିଶ୍ଚୟ। ଫିଲ୍ମ ନିଜର ଉଜୁଡ଼ା ଜୀବିକାକୁ ସଜାଡ଼ୁଥିବା ଦୃଶ୍ୟ ସହିତ ଏଭଳି ଗୀତ ବେଶ୍ ମାର୍ମିକ ଥିଲା।
ଯେଉଁଥିରେ ସେ କହୁଥିଲେ ଏବେ ସବୁ ସମ୍ପର୍କ ତୁଟାଇ, ସ୍ମୃତି ସବୁ ଦୁଃଖ ବିଜଡ଼ିତ କରି, ମୁଁ ଦୁଃଖ ସହ ସମ୍ପର୍କ ଯୋଡ଼ି କୁଆଡ଼େ ଯିବି? କିନ୍ତୁ ଆଜି ସେ ସମସ୍ତଙ୍କ ସହ ସମ୍ପର୍କ ତୁଟାଇ ଦୁଃଖ ସାଗରରେ ଭସାଇ ଦେଇ ଚାଲି ଯାଇଛନ୍ତି ବହୁ ଦୂରକୁ। ଏବେ ତାଙ୍କ ଅବର୍ତ୍ତମାନରେ ସମସ୍ତେ କହୁଛନ୍ତି, ତମେ କୁଆଡ଼େ ଗଲ ବିଲୁ, ତମେ କୁଆଡ଼େ ଗଲ…
ମାତ୍ର ୫୩ ବର୍ଷ ବୟସରେ ଅଧୁରା ରହିଗଲା ତାଙ୍କ ଅସରନ୍ତି ଅଭିନୟର ଯାଦୁ। କ୍ୟାନସର ସହ ବଞ୍ଚିବା ପାଇଁ କରୁଥିବା ଲଢ଼େଇରେ ଇରଫାନ ଖାନ ଦ୍ୱିତୀୟ ଥର ହାରି ଯାଇଛନ୍ତି। ୨୦୧୭ରେ ଲଣ୍ଡନରେ ସେ ଏକ ବରିଳ କ୍ୟାନସର ରୋଗ ସହ ଲଢ଼େଇ କରି ଜିତିଥିଲେ। ଅଭିନୟ ମଧ୍ୟ କରିଥିଲେ। ହେଲେ ଶନିବାର ମା’ଙ୍କ ମୃତ୍ୟୁ ପରେ ସେ ଭାଙ୍ଗି ପଡ଼ିଥିଲେ। ଆଉ ଏହାର ୪ ଦିନ ପରେ ଦୁନିଆର ରଙ୍ଗମଞ୍ଚକୁ ଅଲବିଦା କହି ସବୁଦିନ ପାଇଁ ବିଦାୟ ନେଇଗଲେ ଏହି ମହାନ କଳାକାର।
ସତେ ଯେମିତି ଜନ୍ନତରୁ ତାଙ୍କ ପାଇଁ ଡାକରା ଆସିଥିଲା, ଆଉ ଏକ ରଙ୍ଗମଞ୍ଚ ପାଇଁ। ବୋଧେ ଏହି ଡାକରା ପାଇ ବିଲୁ ଓରଫ ଇରଫାନ ଏହି ଦୁନିଆକୁ ଅଲବିଦା କହିଛନ୍ତି।
୧୯୮୮ରୁ ୨୦୨୦ ଏହି ଲମ୍ବା ଫିଲ୍ମ କ୍ୟାରିୟର ମଧ୍ୟରେ ଇରଫାନଙ୍କ ଅଭିନୟ କେବଳ ବଲିଉଡରେ ନୁହେଁ ହଲିଉଡରେ ବି ଚହଳ ସୃଷ୍ଟି କରିଥିଲା। ତାଙ୍କ ଚେହେରା ହେଉ କି କଣ୍ଠସ୍ୱର। ଅଭିନୟର ଷ୍ଟାଇଲ ହେଉ କି ଡାଇଲଗ୍ ଡେଲିଭରି ସବୁଥିରେ ଥିଲା ସ୍ୱତନ୍ତ୍ରତା।
ପାନ୍ ସିଂହ ତୋମାର, ବିଲୁ, ହିନ୍ଦୀ ମିଡିୟମ, ପିକୁ, ହାଇଦର, ଲାଇଫ ଇନ ଏ ମେଟ୍ରୋ ଭଳି ଫିଲ୍ମରେ ଇରଫାନ ଖାନ ନିଜର ଚତ୍ମକାରିତା ଦେଖାଇ ସମସ୍ତଙ୍କ ମନରେ ନିଜ ପାଇଁ ସ୍ୱତନ୍ତ୍ର ସ୍ଥାନ ସୃଷ୍ଟି କରିଥିଲେ। ଖାସ ସେହି କାରଣ ପାଇଁ ତ ଆଜି ତାଙ୍କୁ ସମସ୍ତେ ଝୁରୁଛନ୍ତି। ଜାତୀୟ ପୁରସ୍କାର ଠାରୁ ଆରମ୍ଭ କରି ଫିଲ୍ମ ଫେୟାର ଆୱାର୍ଡ ଓ ପଦ୍ମଶ୍ରୀ ସବୁଥିରେ ସେ ସମ୍ମାନିତ ହୋଇଛନ୍ତି।
ଆହୁରି ପଢ଼ନ୍ତୁ
ଇରଫାନ ଯେ କେବେ ଫିଲ୍ମ ଷ୍ଟାର ହେବେ ସେକଥା କେହି ବି ଭାବି ନଥିଲେ। କାରଣ କ୍ରିକେଟ ପ୍ରତି ତାଙ୍କର ପିଲା ଦିନରୁ ଦୁର୍ବଳତା ଥିଲା। ହେଲେ ବାପା ଜଣେ ଟାୟାର ମରାମତି ଦୋକାନୀ ହୋଇଥିବାରୁ ଏହି ସ୍ୱପ୍ନକୁ ସେ ନିଜ ମଧ୍ୟରେ ମାରି ଦେଇଥିଲେ।
ମା’ ଚାହୁଁଥିଲେ ପୁଅ କିଛି ସମ୍ମାନୀୟ ଚାକିରି କରୁ। ଲେକଚର୍ ହେଉ। ହେଲେ ଇରଫାନଙ୍କ ମନ ଏସବୁରେ ଲାଗୁ ନଥିଲା। ତାଙ୍କ ଭିତରେ ଗୋଟିଏ କଳାକାରର ଉଚ୍ଚାଟପଣ ତାଙ୍କୁ ବ୍ୟତିବ୍ୟସ୍ତ କରୁଥିଲା। ଏଥିପାଇଁ ସେ ଘରେ ମିଛି କହି ରାଜସ୍ଥାନର ଜୟପୁରରୁ ଚାଲିଯାଇଥିଲେ ଦିଲ୍ଲୀ।
ସେଠାରେ ନ୍ୟାସନାଲ ସ୍କୁଲ ଅଫ୍ ଡ୍ରାମାରେ ଅଭିନୟ ଶିକ୍ଷା ପରେ ମୁମ୍ବାଇ ଆସି ଅନେକ ମେଗା ଧାରାବାହିକରେ କାମ କରିଥିଲେ। ଏଥିରେ କିଛି ବର୍ଷ କାମ କରିବା ପରେ ତାଙ୍କ ଉପରେ ନିର୍ଦ୍ଦେଶିକା ମୀରା ନାୟାରଙ୍କ ନଜର ପଡ଼ିଥିଲା।
୧୯୮୮ରେ ‘ସଲାମ୍ ବମ୍ବେ’ରେ ଅଭିନୟର ସୁଯୋଗ ପାଇଥିବା ଇରଫାନ ଆଉ ହାର ମାନି ନଥିଲେ। ଏହି ଠାରୁ ହିଁ ଆରମ୍ଭ ହୋଇଥିଲା ଇରଫାନଙ୍କ ଅଭିନୟର ଯାତ୍ରା। ଗୋଟିଏ ପରେ ଗୋଟିଏ ହିଟ୍ ଫିଲ୍ମ ତାଙ୍କୁ ରାତାରାତି ଷ୍ଟାରଡମ ଆଖ୍ୟା ଦେଇଥିଲା। ପ୍ରାୟ ୫୦ରୁ ଅଧିକ ଫିଲ୍ମରେ ତାଙ୍କ ଦମଦାର ଅଭିନୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା।
ସ୍ଲମ୍ ଡଗ୍ ମିଲେନିୟର, ଲାଇଫ୍ ଅଫ୍ ପାଇ, ଜୁରାସିକ୍ ଓ୍ୱାଲର୍ଡ, ସ୍ପାଇଡର ମ୍ୟାନ୍ ଭଳି ହଲିଉଡ୍ ଫିଲ୍ମରେ ଅଭିନୟ କରି ଇରଫାନ ନିଜ ଦକ୍ଷତାର ବଳିଷ୍ଠ ପ୍ରମାଣ ଦେଇଥିଲେ।
ଇରଫାନଙ୍କ ଦେହାନ୍ତ ପରେ ତାଙ୍କ ପରିବାର ପ୍ରତି ଦେଶ ବିଦେଶରୁ ଛୁଟିଛି ସମବେଦନାର ସୁଅ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଅମିତାଭ ବଚ୍ଚନ, ଅନୁପମ ଖେର୍ ଶାହରୁଖ୍ ଖାନ୍, ଅକ୍ଷୟ କୁମାର, ଅଜୟ ଦେବଗନ, ଆମୀର ଖାନ୍, ସଲମାନ ଖାନଙ୍କ ସହ ରାଜନୀତି, କ୍ରୀଡ଼ା ଆଦି ବିଭିନ୍ନ କ୍ଷେତ୍ରର ପ୍ରମୁଖ ବ୍ୟକ୍ତିତ୍ୱ ଇରଫାନଙ୍କ ଭଳି ଉଜ୍ଜଳ ନକ୍ଷତ୍ରଙ୍କୁ କୋହଭରା ବିଦାୟ ଜଣାଇଛନ୍ତି।
