କରୋନା ଲଢ଼େଇ ଭିତରେ ଶପଥ ନେଲେ ମଧ୍ୟପ୍ରଦେଶର ୫ କ୍ୟାବିନେଟ ମନ୍ତ୍ରୀ

ଭୋପାଲ: ସାରା ଦେଶ କରୋନା ବିରୋଧରେ ଲଢ଼େଇ କରୁଥିବା ବେଳେ ମଧ୍ୟପ୍ରଦେଶରେ କ୍ଷମତାସୀନ ବିଜେପି ସରକାରରେ ୫ ଜଣ ସଦସ୍ୟ କ୍ୟାବିନେଟ ମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି। ଆଜି ମଧ୍ୟାହ୍ଣରେ ରାଜ୍ୟପାଳ ଲାଲଜୀ ଟଣ୍ଡନ ଓ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନଙ୍କ ଉପସ୍ଥିତିରେ ୫ ଜଣ ବିଧାୟକ କ୍ୟାବିନେଟ ମନ୍ତ୍ରୀ ଭାବେ ପଦ ଓ ଗୋପନୀୟତାର ଶପଥ ପାଠ କରିଛନ୍ତି।

ମଧ୍ୟପ୍ରଦେଶରେ କଂଗ୍ରେସ ସରକାର ଗଠନ କରିଥିଲେ ହେଁ ଦଳର ବିଧାୟକଙ୍କ ବିଦ୍ରୋହ ଯୋଗୁ ଏହା ଭାଙ୍ଗି ଯାଇଥିଲା। ଫଳରେ ଗତ ମାସରେ ବିଜେପି ନେତା ଶିବରାଜ ସିଂହ ଚୌହାନ ୪ର୍ଥ ଥର ପାଇଁ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ।

କରୋନା ଲଢ଼େଇ ପାଇଁ ଲକଡାଉନ ଓ କଟକଣା ଜାରି ହେବାରୁ ଶିବରାଜ ନିଜ ମନ୍ତ୍ରିମଣ୍ଡଳର ସଂପ୍ରସାରଣ କରିପାରି ନଥିଲେ। କିନ୍ତୁ ଆଜି ନରୋତ୍ତମ ମିଶ୍ର, ମୀନା ସିଂହ, କମଲ ପଟେଲ, ତୁଲସୀରାମ ସିଲୱାତ ଓ ଗୋବିନ୍ଦ ସିଂହ କ୍ୟାବିନେଟ ମନ୍ତ୍ରୀ ଭାବେ ଶପଥ ନେଇଛନ୍ତି। ତୁଲସୀରାମ ଓ ଗୋବିନ୍ଦ ନିକଟରେ କଂଗ୍ରେସ ଛାଡ଼ି ବିଜେପିରେ ଯୋଗଦେଇଥିଲେ।

ଅନ୍ୟପକ୍ଷରେ ଆଜି ଶପଥପାଠ ଉତ୍ସବ କରାଯାଉଥିଲେ ହେଁ ସୁରକ୍ଷାକର୍ମୀଙ୍କୁ ଛାଡ଼ି ଦେଲେ ଆଉ କାହା ମୁହଁରେ ମାସ୍କ ନଥିଲା। ମଧ୍ୟପ୍ରଦେଶରେ ଏଯାଏ କରୋନା ଯୋଗୁ ୭୪ ଜଣଙ୍କ ମୃତ୍ୟୁ ଘଟିଥିବା ବେଳେ ୧୪୮୫ ଜଣ ଆକ୍ରାନ୍ତ ହୋଇଛନ୍ତି।