ସତ୍ୟଶିଖା (ନୂଆଦିଲ୍ଲୀ) ୦୫/୦୨/୨୦୨୧ : ସଂସଦରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ୍ ଆଗତ କରିବା ପରେ ସେୟାର ବଜାରରେ ଉତ୍ସାହ ଦେଖିବାକୁ ମିଳିଛି । ଶୁକ୍ରବାର ବିଏସଇ ସେନସେକ୍ସ ଆରମ୍ଭରୁ ୪୦୦ ଅଙ୍କ ବୃଦ୍ଧି ପାଇ ପ୍ରଥମ ଥର ୫୧ ହଜାର ସ୍ତରରେ ପହଁଚିଛି । ସେହିପରି ନିଫ୍ଟି ମଧ୍ୟ ୧୫୦୦୦ ଅଙ୍କ ପାର୍ କରିଛି । ଏସବିଆଇର ସେୟାର ୧୦ ପ୍ରତିଶତ ଅପର ସର୍କିଟକୁ ସ୍ପର୍ଶ କରିଛି । ସକାଳେ ସେନସେକ୍ସର .୩୦ରୁ ୨୫ଟି ସେୟାର ଅଭିବୃଦ୍ଧିରେ ଖୋଲିଥିଲା ।
ଏହାପୂର୍ବରୁ ଗତ ୪ ଦିନ ହେଲା ସେୟାର ବଜାରରେ ଭଲ କାରବାର ହେଉଛି । ବଜେଟ୍ ପୂର୍ବରୁ ଲଗାତର ୬ ଦିନ ଧରି ସେୟାର ବଜାରରେ ନିରାଶା ଦେଖିବାକୁ ମିଳିଥିଲା । କିନ୍ତୁ ପରେ ସ୍ଥିତି ବଦଳିଥିଲା । ଗୁରୁବାର ସେନସେକ୍ସ ୩୫୮.୫୪ ଅଙ୍କ ଅର୍ଥାତ ୦.୭୧ ପ୍ରତିଶତ ବୃଦ୍ଧି ପାଇ ୫୦୬୧୪ରେ ପହଁଚିଥିଲା । ନିଫ୍ଟି ମଧ୍ୟ ୧୦୬ ଅଙ୍କ ଅର୍ଥାତ ୦.୭ ପ୍ରତିଶତ ୧୪୮୯୬ର ରେକର୍ଡ ସ୍ତରରେ ପହଁଚିଥିଲା ।
ଏତତ୍ ବ୍ୟତୀତ, ବିଏସଇର ମାର୍କେଟ୍ କ୍ୟାପ୍ ୨୦୦ ଲକ୍ଷ କୋଟି ଟଙ୍କା ଅତିକ୍ରମ କରିଛି । କାରବାର ବେଳେ ସେନସେକ୍ସ ସର୍ବନିମ୍ନ ୪୯୯୨୬.୪୫ ଓ ୫୦୬୧୪.୨୯ର ସର୍ବାଧିକ ସ୍ତର ଛୁଇଁଥିଲା । ସେନସେକ୍ସର ୩୦ରୁ ୧୭ଟି ସେୟାର ଅଭିବୃଦ୍ଧିରେ ବନ୍ଦ ହୋଇଥିଲା । ଆଇଟିସିର ସେୟାର ସବୁଠାରୁ ୬.୨୧ ପ୍ରତିଶତ ବୃଦ୍ଧି ପାଇତିବା ବେଳେ ଏସବିଆଇ ଓ ବଜାଜ ଫାଇନାନ୍ସ ମଧ୍ୟ ଲାଭରେ ରହିଥିଲେ ।
