ସତ୍ୟଶିଖା(ଭୁବନେଶ୍ୱର) ୧୧.୧୨.୨୦୨୧: ରାଜଧାନୀ ଭୁବନେଶ୍ୱରରେ ପୁଣି କାୟା ମେଲାଇବାରେ ଲାଗିଛି ଭୂତାଣୁ । ଗତ ୩ ଦିନ ମଧ୍ୟରେ ରାଜଧାନୀରେ ଦୈନିକ ସଂକ୍ରମଣ ୨ ଥର ଶହେ ପାର କରିଛି । ନିକଟରେ ଭୁବନେଶ୍ୱର ମହାନଗର ନିଗମ (ବିଏମ୍ସି) କରୋନାର ନୂଆ ଭୂତାଣୁ ଓମିକ୍ରମ ଡ଼ରରେ ସହରରେ ଟେଷ୍ଟିଂ ବଢ଼ାଇଛି । ଯାହାଫଳରେ ଦୈନିକ ସଂକ୍ରମଣ ବଢ଼ିଥିବା ଆଶଙ୍କା କରାଯାଉଥିବାବେଳେ ଏବେ ମଧ୍ୟ ଜନସାଧାରଣ କରୋନା କଟକଣାର ଅନୁପାଳନ କରୁ ନଥିବା ନଜରକୁ ଆସିଛି । ବିଶେଷ କରି କହିବାକୁ ଗଲେ ଭୁବନେଶ୍ୱର ହାଟ ବଜାରରେ ଏବେ ଭିଡ଼ ଅସମ୍ଭାଳ ହେଉଥିବା ପରିଲିକ୍ଷିତ ହେଉଥିବାବେଳେ ଏକାଧିକ ସାମାଜିକ କାର୍ଯ୍ୟ ତଥା ସଭା ହେଉଛି ।
ଯେଉଁଠି ଲୋକଙ୍କ ମଧ୍ୟ ସଚେତନତାର ଅଭାବ ଓ ଭୁବନେଶ୍ୱର ମହାନଗର ନିଗମ (ବିଏମ୍ସି)ର ଯାଞ୍ଚ ପ୍ରଭାବଶୂନ୍ୟ ପରିଲିକ୍ଷିତ ହୋଇଛି। ବିଶ୍ୱସାରା ଏବେ କରୋନାର ନୂଆ ଉପପ୍ରଜାତି ଓମିକ୍ରନ ଭୟର ବାତାବରଣ ଖେଳାଇଥିବାବେଳେ ରାଜଧାନୀବାସୀଙ୍କ ଅସାବଧାନତା ପୁଣି ସଂକ୍ରମଣ ଫେରାଇବାରେ ସହାୟକ ହେବ । ତେଣୁ ଏବେଠାରୁ ଏଥିପ୍ରତି ସତର୍କତା ଅବଲମ୍ବନ କରିବାକୁ ରାଜଧାନୀବାସୀଙ୍କୁ ବିଏମ୍ସି କର୍ତ୍ତୃପକ୍ଷ ଅପିଲ କରିଛନ୍ତି ।
ଅବଶ୍ୟ ରାଜ୍ୟ ତଥା ରାଜଧାନୀ ଭୁବନେଶ୍ୱରରୁ ଏଯାବତ୍ କୌଣସି ଚିହ୍ନଟ ଆକ୍ରାନ୍ତ ଓମିକ୍ରନ ଚିହ୍ନଟ ହୋଇନାହାଁନ୍ତି । କିନ୍ତୁ ଭୁବନେଶ୍ୱରର ପୃଥକ ଶିକ୍ଷାନୁଷ୍ଠାନରୁ ନିକଟରେ ପଜିଟିଭ୍ ଚିହ୍ନଟ ହୋଇଛନ୍ତି, ଯାହା ଏବେ ସମସ୍ତଙ୍କ ପାଇଁ ଚିନ୍ତାର କାରଣ ପାଲଟିଛି । ବିଏମ୍ସି ସହରର ସମସ୍ତ ଘରୋଇ ଓ ସରକାରୀ ଶିକ୍ଷାନୁଷ୍ଠାନ ସମେତ ସମ୍ବେଦନଶୀଳ ସ୍ଥାନରେ ଟେଷ୍ଟିଂ ବଢ଼ାଇଛି । ଏଯାବତ୍ ପ୍ରାୟ ଶହେରୁ ଊର୍ଦ୍ଧ୍ୱ ବିଦେଶ ଫେରନ୍ତା ଭୁବନେଶ୍ୱରକୁ ଫେରିଥିବାବେଳେ ସେମାନଙ୍କ ଉପରେ ନଜର ରଖାଯାଉଛି । ସହରରେ ଏଥିପାଇଁ ଆର୍ଆର୍ଟି ଟିମ୍ ନିୟୋଜିତ କରାଯାଇଛି ।
