ସତ୍ୟଶିଖା (ନୂଆଦିଲ୍ଲୀ) ୧୫.୧୨.୨୦୨୦ : ଭାରତର ପ୍ରମୁଖ କ୍ୟାବ୍ କମ୍ପାନୀ Ola ଘୋଷଣା କରିଛି ଯେ ସେ ତାମିଲନାଡ଼ୁ ରାଜ୍ୟ ସରକାରଙ୍କ ସହ ଏକ ଚୁକ୍ତିରେ ହସ୍ତାକ୍ଷର କରିଛି । କମ୍ପାନୀ ଏଠାରେ ସବୁଠୁ ବଡ଼ ସ୍କୁଟର ଫ୍ୟାକ୍ଟ୍ରି ଖୋଲିବାକୁ ଯାଉଛି । କମ୍ପାନୀର ଦାବି ରହିଛି ଯେ ଏହି ନୂଆ ଫ୍ୟାକ୍ଟ୍ରିର ଆରମ୍ଭ ହେବା ସହ ତାମିଲନାଡ଼ୁରେ ବହୁଳ ମାତ୍ରାରେ ଲୋକଙ୍କୁ ଚାକିରୀ ମିଳିବାର ସୁଯୋଗ ସୃଷ୍ଟି ହେବ ।
କମ୍ପାନୀ ଦ୍ୱାରା ପ୍ରାପ୍ତ ସୂଚନା ଅନୁସାରେ Ola ଏହି ଫ୍ୟାକ୍ଟ୍ରିର ନିର୍ମାଣରେ ପାଖାପାଖି ୨,୪୦୦କୋଟି ଟଙ୍କାର ବିନିଯୋଗ କରିବ । ଏହି ଫ୍ୟାକ୍ଟ୍ରିର ବାର୍ଷିକ ଉତ୍ପାଦନ କ୍ଷମତା ୨୦ଲକ୍ଷ ୟୁନିଟସ୍ ରହିବ । ଏହି ଫ୍ୟାକ୍ଟ୍ରିରୁ ୧୦,୦୦୦ଲୋକଙ୍କ ଚାକିରୀ ମିଳିବାର ସମ୍ଭାବନ ରହିଛି । କମ୍ପାନୀର କହିବା ଅନୁସାରେ ଏହି ଫ୍ୟାକ୍ଟ୍ରି କେବଳ ରୋଜଗାରର ସୁଯୋଗ ସୃଷ୍ଟି କରିବ ନାହିଁ ବରଂ ଏହା ଦ୍ୱାରା ଦେଶର ପ୍ରାଯୁକ୍ତିକ କ୍ଷେତ୍ରରେ ବଳ ମିଳିବ । ଇଲେକ୍ଟ୍ରିକ ମୋବିଲିଟି କ୍ଷେତ୍ରରେ ଲୋକାଲ୍ ମାନୁଫ୍ୟାକ୍ଚରିଂକୁ ମଧ୍ୟ ଗୁରୁତ୍ବ ମିଳିବ । ଏହି ଫ୍ୟାକ୍ଟ୍ରିରେ ନିର୍ମିତ ଗାଡ଼ିଗୁଡ଼ିକୁ ୟୁରୋପୀୟ,ଏସିୟ ଏବଂ ଲାଟିନ୍ ଆମେରିକୀୟ ବଜାରରେ ମଧ୍ୟ ରପ୍ତାନୀ କରାଯିବ ।
କମ୍ପାନୀ ଖୁବ୍ ଶୀଘ୍ର ବଜାରରେ ଇଲେକ୍ଟ୍ରିକ୍ ସ୍କୁଟର ଲଞ୍ଚ କରିବାର ପ୍ରସ୍ତୁତି କରୁଛି । ଏହା ପୂର୍ବରୁ କମ୍ପାନୀ ଘୋଷଣା କରିଥିଲା ଯେ ସେ ନିଜ ଇଲେକ୍ଟ୍ରିକ୍ ମୋବିଲିଟି ବିଜନେସ୍ ପାଇଁ ୨୦୦୦ଲୋକଙ୍କୁ ହାୟର କରିବ । ଭାରତରେ ମଧ୍ୟ ଇଲେକ୍ଟ୍ରିକ୍ ଗାଡ଼ିଗୁଡ଼ିକର ଚାହିଦା ଦିନକୁ ଦିନ ବଢ଼ିବାକୁ ଲାଗିଛି,ଖାସ୍ କରି ଦୁଇ ଚକିଆ ସେଗମେଣ୍ଟରେ ଲୋକେ ଅଧିକ ଆଗ୍ରହ ଦେଖାଉଛନ୍ତି । ଏବର୍ଷ ଆରମ୍ଭରେ ବଜାଜ ଅଟୋ ନିଜ ଚେତକ ଏବଂ T.V.S Motors ଆଇକ୍ୟୁବ୍ ଇଲେକ୍ଟ୍ରିକ ସ୍କୁଟରକୁ ବଜାରରେ ଛଡ଼ାଯିବ । ଏହା ବ୍ୟତୀତ ବଜାରରେ ଇଲେକ୍ଟ୍ରିକ୍ କାରର ମଧ୍ୟ ବିସ୍ତୃତ ରେଞ୍ଜ ରହିଛି ।
