ଶ୍ରୀନଗର: ପାକିସ୍ତାନରୁ ଅସ୍ତ୍ରଶସ୍ତ୍ର ଧରି ଆତଙ୍କବାଦୀଙ୍କ ପାଖକୁ ଆସୁଥିବା ଏକ ଡ୍ରୋନକୁ ଆଜି ଭାରତୀୟ ସୁରକ୍ଷାକର୍ମୀ ଗୁଳି କରି ଖସାଇ ଦେଇଛନ୍ତି। ଜମ୍ମୁ-କଶ୍ମୀରର କଠୁଆ ଜିଲ୍ଲାରେ ଏହି ଘଟଣା ଘଟିଛି।
ଡ୍ରୋନ ମଧ୍ୟରୁ ଆମେରିକା ନିର୍ମାଣ କରିଥିବା ଏମ-୪ ରାଇଫଲ, ୨ଟି ମ୍ୟାଗାଜିନ ଓ ଗୁଳିଗୋଳା ସୁରକ୍ଷାକର୍ମୀ ଠାବ କରିଛନ୍ତି। ଜମ୍ମୁ-କଶ୍ମୀରରେ ଥିବା ଆତଙ୍କବାଦୀଙ୍କ ପାଖକୁ ହିଁ ପାକିସ୍ତାନ ଏଭଳି ଅସ୍ତ୍ରଶସ୍ତ୍ର ପଠାଉଥିବା ପୁଲିସ୍ କହିଛି।
ଆହୁରି ପଢ଼ନ୍ତୁ
ଅଲୀ ଭାଇ ନାମକ ଆତଙ୍କବାଦୀ ପାଖକୁ ଏହା ପଠା ଯାଉଥିଲା। ଏହି ପେଲଡ୍ରେ ତା’ର ନାଁ ରହିଛି। ଡ୍ରୋନଟି ବ୍ଲେଡରୁ ବ୍ଲେଡ ୮ ଫୁଟ୍ ଦୈର୍ଘ୍ୟ ବିଶିଷ୍ଟ। ଏହାକୁ କାଠୁଆ ସେକ୍ଟରରେ ଥିବା ବିଏସ୍ଏଫର ପାନସେର ପୋଷ୍ଟର ଅପରପାର୍ଶ୍ୱରୁ ନିୟନ୍ତ୍ରଣ କରାଯାଉଥିଲା।
ଆଜି ଭୋର ୫.୧୦ ସମୟରେ ଡ୍ରୋନଟି ସୀମା ସେପଟୁ ଭାରତରେ ପ୍ରବେଶ କରୁଥିବା ଦେଖିବାକୁ ମିଳିଥିଲା। ଏହାପରେ ବିଏସଏଫ ଯବାନମାନେ ୯ ରାଉଣ୍ଡ ଗୁଳି ଚଳାଇ ଏହାକୁ ଖସାଇ ଦେଇଥିଲେ।
ପୁଲିସ୍ ପକ୍ଷରୁ କୁହାଯାଇଛି ଯେ ଚଳିତ ମାସରେ ନିହତ ହୋଇଥିବା ଜୈଶ-ଏ-ମହମ୍ମଦର ଆତଙ୍କବାଦୀଙ୍କ ଠାରୁ ସମାନ ଧରଣର ଅସ୍ତ୍ରଶସ୍ତ୍ର ଠାବ ହୋଇଥିଲା। ପାକିସ୍ତାନ ହିଁ ଏଠାରେ ଥିବା ଜୈଶ ଆତଙ୍କୀଙ୍କୁ ଅସ୍ତ୍ରଶସ୍ତ୍ର ଯୋଗାଇ ଜମ୍ମୁ-କଶ୍ମୀରରେ ହିଂସା ସୃଷ୍ଟି କରିବାକୁ ଚାହୁଁଥିବା ଏଥିରୁ ସ୍ପଷ୍ଟ ହେବାରେ ଲାଗିଛି।
