ସତ୍ୟଶିଖା (ଭୁବନେଶ୍ୱର) ୨୮/୧୨/୨୦୨୦ : ସ୍ଥାୟୀ ନିଯୁକ୍ତି ଦାବିରେ ଲୋୟର୍ ପିଏମ୍ଜିରେ ବସିଥିବା ଏଏନ୍ଏମ୍ ସ୍ଵାସ୍ଥକର୍ମୀଙ୍କ ଆନ୍ଦୋଳନକୁ ଆଜି ମାସେ ପୂରିଛି । ନା ସରକାର ସେମାନଙ୍କ କଥା ଶୁଣୁଛନ୍ତି, ନା ଏଏନ୍ଏମ୍ କର୍ମୀମାନେ ଆନ୍ଦୋଳନରୁ ଓହରୁଛନ୍ତି । ସ୍ଥାୟୀ ନିଯୁକ୍ତି ନ ପାଇବା ଯାଏ ସେମାନେ ଉଠିବେ ନାହିଁ ବୋଲି ଅଡ଼ି ବସିଛନ୍ତି । ପ୍ରଥମେ ଧାରଣା, ପରେ ଆମରଣ ଅନଶନ ଶେଷରେ ଆତ୍ମାହୁତି ଉଦ୍ୟମ କରିଥିବା ଏହି ଏଏନ୍ଏମ୍ ସ୍ଵାସ୍ଥକର୍ମୀମାନେ ନିଜ ଦାବି ପୂରଣ କରିବା ପାଇଁ ଭିନ୍ନ ଢ଼ଙ୍ଗରେ ପ୍ରତିବାଦ କରିଛନ୍ତି । ଆନ୍ଦୋଳନକୁ ମାସେ ପୂରିବା ଅବସରରେ ସରକାରଙ୍କୁ ନିବେଦନ କରିବାକୁ ଯାଇ ଆଜି ସେମାନେ ‘ବନ୍ଦେ ଉତ୍କଳ ଜନନୀ’ ଗାନ କରିଛନ୍ତି । ରାଜ୍ୟ ସରକାର କରୋନା ଯୋଦ୍ଧାଙ୍କୁ ସମ୍ମାନ ତଥା ଉତ୍ସାହିତ କରିବା ପାଇଁ ‘ବନ୍ଦେ ଉତ୍କଳ ଜନନୀ’ ସଙ୍ଗୀତ ରାଜ୍ୟବାସୀଙ୍କୁ ସାମୂହିକ ଭାବେ ଗାଇବା ପାଇଁ କହିଥିଲେ । ତେଣୁ ଆଜି ରାଜ୍ୟ ସଙ୍ଗୀତ ଗାଇ କରୋନା ଯୋଦ୍ଧାଙ୍କ ଦାବି ପୂରଣ କରିବା ପାଇଁ ଏଏନ୍ଏମ୍ମାନେ ଗୁହାରି କରିଛନ୍ତି ।
ସଂଘର ସଦସ୍ୟା ରଶ୍ମିରେଖା ପାଲ୍ କହିଛନ୍ତି, ମାସେ ମଧ୍ୟରେ ଆନ୍ଦୋଳନରତ ଏଏନ୍ଏମ୍ମାନଙ୍କ ମଧ୍ୟରୁ ପ୍ରାୟ ୩୦ରୁ ଅଧିକ ଅସୁସ୍ଥ ହୋଇଛନ୍ତି । କନ୍ଧମାଳ ବାଲିଗୁଡ଼ାର ସ୍ବାସ୍ଥ୍ୟକର୍ମୀ ନିରୁପମା ଦିଗାଲ ଅସୁସ୍ଥ ହୋଇ ତାଙ୍କର ଗର୍ଭନଷ୍ଟ ହୋଇଯାଇଛି । ମାତ୍ର ଯେ ପର୍ଯ୍ୟନ୍ତ ସରକାର ସେମାନଙ୍କ ଦାବି ମାନିନାହାନ୍ତି, ସେ ପର୍ଯ୍ୟନ୍ତ ସେ ଆନ୍ଦୋଳନରୁ ହଟିବୁ ନାହିଁ ବୋଲି ସେ କହିଛନ୍ତି । ଅପରପକ୍ଷରେ ୮ଜଣ ଗର୍ଭବତୀ ଏଏନ୍ଏମ୍ ସ୍ଵାସ୍ଥକର୍ମୀ ଧାରଣାରେ ବସିଥିବା ସୂଚନା ମିଳିଛି । ରଶ୍ମିରେଖା ଆହୁରି କହିଛନ୍ତି, ରାଜ୍ୟ ସରକାର ବର୍ତ୍ତମାନ କରୋନା ନିୟନ୍ତ୍ରଣ କରି ଯେଉଁ ବାହାବା ନେଉଛନ୍ତି, ତା’ ପଛରେ ଆମମାନଙ୍କ ହାତ ରହିଛି । କାରଣ ଆମେ ମହିଳା ସ୍ବାସ୍ଥ୍ୟକର୍ମୀମାନେ ସରକାରଙ୍କ ସହ କାନ୍ଧରେ କାନ୍ଧ ମିଶାଇ କାମ କରିଥିଲୁ । ଗାଁ’ରୁ ଗାଁ’ ବୁଲି କରୋନା ଲକ୍ଷଣ ଥିବା ବ୍ୟକ୍ତିଙ୍କୁ ପରୀକ୍ଷା କରାଉଥିଲୁ । ବିଦେଶରୁ ଆସିଥିବା ପ୍ରବାସୀଙ୍କୁ ଟ୍ରାକିଂ କରି ସେମାନଙ୍କୁ ଚିହ୍ନଟ କରିଥିଲୁ । ଯେଉଁଥିପାଇଁ ଆଜି ରାଜ୍ୟରେ କରୋନା ପ୍ରକୋପ କମିଛି । ମାତ୍ର ସରକାର ଆମର କୌଣସି ଦାବିକୁ କର୍ଣ୍ଣପାତ କରୁନାହାନ୍ତି । ସେହିଭଳି ସଂଘ ପକ୍ଷରୁ କୁହାଯାଇଛି ଯେ ଦୀର୍ଘ ୧୨ ବର୍ଷ ହେବ ଏଏନ୍ଏମ୍ ସ୍ଵାସ୍ଥକର୍ମୀଙ୍କ ପାଇଁ ସରକାର ନିଯୁକ୍ତି ସୃଷ୍ଟି କରୁନାହାନ୍ତି । କିନ୍ତୁ ଗାଁ’କୁ କାମ ମା’କୁ ସମ୍ମାନର କଥା କହୁଛନ୍ତି । ଦୀର୍ଘ ମାସେ କାଳ ଆନ୍ଦୋଳନ କରିବା ପରେ ସରକାରଙ୍କ ସ୍ଥାଣୁତା ଓ ବିରୋଧୀଙ୍କ ସାନ୍ତ୍ବନା ବ୍ୟତୀତ ଏଏନ୍ଏମ୍ କିଛି ପାଇ ନଥିବା କହିଛନ୍ତି ।
