ସତ୍ୟଶିଖା( ଅମରାବତୀ )୩୦.୦୪.୨୦୨୨ : ସଡ଼କ ଦୁର୍ଘଟଣା ଜନିତ ମୃତ୍ୟୁସଂଖ୍ୟା ଦିନକୁ ବଢ଼ି ବଢ଼ି ଚାଲିଛି । ଦୁର୍ଘଟଣା ବୃଦ୍ଧି ପାଇବା ସହିତ ରାଜପଥରେ ମୃତାହତଙ୍କ ସଂଖ୍ୟା ବି ବଢ଼ିବାରେ ଲାଗିଛି । ବୈଷୟିକ ଜ୍ଞାନକୌଶଳ ମାଧ୍ୟମରେ ଦୁର୍ଘଟଣାକୁ କିପରି ରୋକାଯାଇ ପାରିବ ସେନେଇ ଜଣେ ଯୁବକଙ୍କ ଅଭିନବ ପ୍ରୟାସ କରିଛନ୍ତି । ଦୁର୍ଘଟଣାରୁ ବର୍ତ୍ତିବା ପାଇଁ ସେ ଏକ ସ୍ବୟଂ ଚାଳିତ ବ୍ରେକ ତିଆରି କରିଛନ୍ତି । ଏହା ଗାଡ଼ିରେ ଲଗାଇବା ଦ୍ବାରା ଦୃତ ଗତିକୁ ହ୍ରାସ କରିବା ସହ ବେଗ ଚିହ୍ନଟ କରିବାରେ ସହାୟକ ହେବ ।
ନିଜର ବିଚକ୍ଷଣ ବୁଦ୍ଧି ବଳରେ ଏଭଳି ଏକ ଡିଜାଇନ ତିଆରି କରିବାରେ ସକ୍ଷମ ହୋଇଥିବା ଯୁବକ ହେଉଛନ୍ତି ଆନ୍ଧ୍ରପ୍ରଦେଶର କାକିନଡ଼ା ଜିଲ୍ଲାର ପିଥାପୁରମ ନିବାସୀ ଲୋକନାଥ । ସେ ଲଭଲି ପ୍ରଫେସନାଲ ବିଶ୍ବବିଦ୍ୟାଳୟରେ ଇଞ୍ଜିନିୟରିଂ ଛାତ୍ର ଅଟନ୍ତି । କୋରୋନା ଯୋଗୁଁ ଦୁଇ ବର୍ଷ ଅନଲାଇନ ମୋଡରେ ପାଠପଢ଼ା ଚାଲୁଥିବା ବେଳେ ଘରେ ରହି ସମୟର ସଠିକ ଉପଯୋଗ କରୁଥିଲେ ଲୋକନାଥ । ଏହାରି ଭିତରେ ସେ ସଡ଼କ ଦୁର୍ଘଟଣା ଜନିତ ଅନେକ ଅଧ୍ୟୟନ କରିଥିଲେ ।
ଲୋକନାଥଙ୍କ ଦ୍ବାରା ଡିଜାଇନ କରାଯାଇଥିବା ଡିଭାଇସଟି ଗତି ଚିହ୍ନଟ କରିବା ସହ ବ୍ରେକିଂ ସିଷ୍ଟମକୁ ନିର୍ଦ୍ଦେଶ ଦେବ । ଏବଂ ଅନ୍ୟ ଗାଡ଼ି ସହ ଧକ୍କା ହେବା ପୂର୍ବରୁ ଅଟୋମେଟିକ ବ୍ରେକ ଲଗାଇ ବେଗ ହ୍ରାସ କରିବ । ଯାହା ଫଳରେ ଦୁର୍ଘଟଣାକୁ ବର୍ତ୍ତିବାର ସମ୍ଭାବନା ରହିଥିବା ଲୋକନାଥ କହିଛନ୍ତି । ଜଳବାୟୁ ପରିବର୍ତ୍ତନ ଦ୍ବାରା ସୃଷ୍ଟି ହେଉଥିବା ବିପଦ ରୋକିବାକୁ ସେ ଆଉ ଏକ ଉଦ୍ଭାବନ କରିଥିଲେ । ତାଙ୍କର ଏହି ଉଦ୍ଭାବନକୁ ଶ୍ରେଷ୍ଠ ଭାବେ ବିବେଚନା କରିଯାଇଥିଲା । ଶିକ୍ଷା ସହିତ ଅନେକ ଗୁଣରେ ଅଧିକାରୀ ହେଉଛନ୍ତି ଲୋକନାଥ । ତାଙ୍କ ପିତା ଜଣେ ପରିବହନ କମ୍ପାନୀର କର୍ମଚାରୀ ଥିବାବେଳେ ମାତା ଗୃହିଣୀ ଅଟନ୍ତି । ନିଜ ପୁଅଙ୍କ ଅନନ୍ୟ ପ୍ରତିଭା ପାଇଁ ଚାରିଆଡୁ ପ୍ରଶଂସା ପାତ୍ର ପାଲଟିଛନ୍ତି ।
