ସତ୍ୟଶିଖା ୧୧.୦୮.୨୦୨୦ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଦିନ 10 ଟି ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ପରାମର୍ଶ କରି ମହାମାରୀ କରୋନା ଭୂତାଣୁ ବିଷୟରେ ସ୍ଥିତି ସମୀକ୍ଷା କରିଛନ୍ତି । ଏହି ବୈଠକରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ମଧ୍ୟ ଉପସ୍ଥିତ ଥିଲେ । କରୋନା ମହାମାରୀ ଭାରତରେ ପ୍ରବେଶ କରିବା ପରଠାରୁ ରାଜ୍ୟମାନଙ୍କ ସହିତ ଏହା ହେଉଛି ପ୍ରଧାନମନ୍ତ୍ରୀଙ୍କ ସପ୍ତମ ସ୍ଥିତି ସମୀକ୍ଷା ବୈଠକ । ଭିଡିଓ ସମ୍ମିଳନୀ ମାଧ୍ୟମରେ ଆରମ୍ଭ ହୋଇଥିବା ଏହି ବୈଠକରେ ଆନ୍ଧ୍ରପ୍ରଦେଶ, କର୍ଣ୍ଣାଟକ, ତାମିଲନାଡୁ, ପଶ୍ଚିମବଙ୍ଗ, ମହାରାଷ୍ଟ୍ର, ପଞ୍ଜାବ, ବିହାର, ଗୁଜୁରାଟ, ତେଲେଙ୍ଗାନା ଏବଂ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ସାମିଲ ହୋଇଥିଲେ । ଏହି ସବୁ ରାଜ୍ୟ ଗୁଡ଼ିକରେ ବହୁଳ ଜନସଂଖ୍ୟା ଏବଂ ଅଧିକ କରୋନା ପ୍ରଭାବିତ ହୋଇଥିବାରୁ ବୈଠକ ଅତ୍ୟନ୍ତ ଗୁରୁତ୍ଵପୂର୍ଣ୍ଣ ବୋଲି କୁହାଯାଉଛି ।
ଏହି ବୈଠକରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ, କୋଭିଡ -19 ରୁ ଉତ୍ପନ୍ନ ହୋଇଥିବା ଆହ୍ଵାନମୂଳକ ପରିସ୍ଥିତି ବିରୋଧରେ ସମସ୍ତ ରାଜ୍ୟ ଯୁଦ୍ଧ କରୁଛନ୍ତି । ଏହି ମହାମାରୀକୁ ନିୟନ୍ତ୍ରଣ କରିବା ପାଇଁ ପ୍ରତ୍ୟେକ ରାଜ୍ୟର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ।
ଦେଶରେ ଗୋଟିଏ ଦିନରେ କରୋନା ଭୂତାଣୁ ସଂକ୍ରମଣରେ ଆକ୍ରାନ୍ତ ରୋଗୀଙ୍କ ସଂଖ୍ୟାରେ ହ୍ରାସ ଘଟିଛି ଏବଂ ମଙ୍ଗଳବାର ଦିନ ଏହି ସଂଖ୍ୟା 53,601ରେ ପହଞ୍ଚିଛି । ଗତ ଚାରି ଦିନରୁ ଦେଶରେ 60,000 ରୁ ଅଧିକ ନୂଆ ମାମଲା ସାମ୍ନାକୁ ଆସିଛି ।
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ମଙ୍ଗଳବାର ଦିନ 53,601 ନୂତନ ରୋଗୀ ଚିହ୍ନଟ ହେବା ପରେ ଦେଶରେ ମୋଟ ସଂକ୍ରମିତଙ୍କ ସଂଖ୍ୟା 22,68,675କୁ ବୃଦ୍ଧି ପାଇଛି । ଏଥି ସହିତ ସଂକ୍ରମଣରୁ ମୁକ୍ତି ପାଇଥିବା ଲୋକଙ୍କ ସଂଖ୍ୟା 15,83,489କୁ ବୃଦ୍ଧି ପାଇଛି ଯେଉଁଥିପାଇଁ ଦେଶରେ ପୁନରୁଦ୍ଧାର ହାର ମଧ୍ୟ 69.80 ପ୍ରତିଶତକୁ ବୃଦ୍ଧି ପାଇଛି ।
