କୋଲକାତା: ପ୍ରବାସୀ ଶ୍ରମିକଙ୍କୁ ନେଇ ପୁଣିଥରେ ମୁହାଁମୁହିଁ ହୋଇଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହ। ରେଳ ବିଭାଗ ଶ୍ରମିକ ସ୍ପେଶାଲ ଟ୍ରେନରେ ପ୍ରବାସୀଙ୍କୁ ନିଜ ନିଜ ଘରକୁ ପଠାଉଛି। ତେବେ ପ୍ରବାସୀମାନେ ଯାଉଥିବା ରାଜ୍ୟରେ କରୋନା ସଂକ୍ରମଣ ବଢ଼ୁଥିବାରୁ ମମତା ବାନାର୍ଜୀ ଏହାକୁ ସମାଲୋଚନା କରିଥିଲେ। ଏପରି କି ସେ ଶ୍ରମିକ ସ୍ପେଶାଲ ଟ୍ରେନକୁ ଲୋକମାନେ କରୋନା ଏକ୍ସପ୍ରେସ କହୁଥିବା ମଧ୍ୟ ସମସ୍ତଙ୍କୁ ଅବଗତ କରାଇଥିଲେ। ମମତାଙ୍କ ଏହି ମନ୍ତବ୍ୟକୁ ଅମିତ ଶାହ କଟାକ୍ଷ କରି ପଶ୍ଚିମବଙ୍ଗ ସରକାରଙ୍କୁ ଟାର୍ଗେଟ କରିଥିଲେ।
କିନ୍ତୁ ଆଜି ମମତା ବାନାର୍ଜୀ ଏହାର ଜବାବ ଦେଇଛନ୍ତି। ସେ କହିଛନ୍ତି, ମୁଁ କେବେ ହେଲେ କରୋନା ଏକ୍ସପ୍ରେସ କଥା କହିନାହିଁ। ଲୋକମାନେ ଶ୍ରମିକ ସ୍ପେଶାଲ ଟ୍ରେନକୁ କରୋନା ଏକ୍ସପ୍ରେସ କହୁଥିବା ମୁଁ ସମସ୍ତଙ୍କୁ ଅବଗତ କରାଇଥିଲି। ମୋ କଥାକୁ ଭୁଲ ଭାବେ ଉପସ୍ଥାପନ କାରାଯାଇଛି।
ସେ ଆହୁରି କହିଛନ୍ତି ଯେ ପ୍ରବାସୀଙ୍କ ପାଇଁ ବିଜେପି କ’ଣ କରିଛି? ଲକଡାଉନ ଘୋଷଣା କରିବାର ଗୋଟିଏ ସପ୍ତାହ ପୂର୍ବରୁ ସେମାନେ କାହିଁକି ପ୍ରବାସୀଙ୍କୁ ନିଜ ନିଜ ରାଜ୍ୟକୁ ପଠାଇଲେ ନାହିଁ? ଯଦି ସେମାନେ ବେଳ ଥାଉଥାଉ ପଦକ୍ଷେପ ନେଇଥାଆନ୍ତେ, ତା’ହେଲେ ପ୍ରବାସୀମାନେ ଆଜି ଏଭଳି ସମସ୍ୟାର ସମ୍ମୁଖୀନ ହୋଇନ ଥାଆନ୍ତେ।
ଆହୁରି ପଢ଼ନ୍ତୁ
ଯେତେବେଳେ ଭିଡ଼ ହେଲା, ଆପଣ ଟ୍ରେନଗୁଡ଼ିକର ଫ୍ରିକ୍ୟୁଏନ୍ସି ବଢ଼ାଇ ଦେଲେ। ଯେଉଁ ଟ୍ରେନରେ ୧୨ଶହ ଲୋକ ଯିବା କଥା, ସେଥିରେ ୨୫ ଶହ ଲୋକଙ୍କୁ ପଠାଯାଉଛି। ଫଳରେ ଲୋକମାନେ ୪୮ରୁ ୭୨ ଘଣ୍ଟା ଯାଏ ଭିଡ଼ ମଧ୍ୟରେ ଫସି ରହି ସଂକ୍ରମିତ ହେଉଛନ୍ତି।
କ’ଣ ପାଇଁ ବିଜେପି ପ୍ରବାସୀମାନଙ୍କୁ ଏପରି ସମସ୍ୟାରେ ପକାଉଛି? ବିଜେପି କହିଥିଲା ଯେ କ’ଣ ପାଇଁ ଗୋଟିଏ ଧାର୍ମିକ ସ୍ଥଳରେ ଏତେ ସଂଖ୍ୟକ ଲୋକ ଏକାଠି ହେଉଥିଲେ। ଏହି କାରଣ ପାଇଁ କୁଆଡ଼େ ସଂକ୍ରମଣ ବଢ଼ିଗଲା। ହେଲେ ଏବେ ବିଜେପି କ’ଣ ପାଇଁ କ୍ଷମତା ଠାରୁ ଅଧିକ ଲୋକଙ୍କୁ ଟ୍ରେନରେ ପଠାଉଛି?
ପ୍ରଥମେ ନୋଟବନ୍ଦୀ ଏବେ ଘର ବନ୍ଦୀ କରିବାରେ କେନ୍ଦ୍ର ସରକାର ଲାଗିଛନ୍ତି। ଲକଡାଉନ ଘୋଷଣା ବେଳେ ସମସ୍ତଙ୍କୁ ପୂର୍ଣ୍ଣ ଦରମା ମିଳିବ ବୋଲି କୁହାଯାଇଥିଲା। ହେଲେ ପରବର୍ତ୍ତୀ ଅବସ୍ଥାରେ ଏଥିରୁ କାଟଛାନ କରାଗଲା। ଲୋକଙ୍କ ସହ କେନ୍ଦ୍ର ସରକାର ଧୋକା କରିଛନ୍ତି।
କୋଭିଡ-୧୯ ସଙ୍କଟ ଭିତରେ କିଛି ଲୋକ ରାଜନୀତି କରିବାରେ ଲାଗିଛନ୍ତି। ଆମେ ଦୋକାନ ଖୋଲିବାକୁ ଅନୁମତି ଦେଇଛୁ। କାରଣ ଦୋକାନ ନଖୋଲିଲେ ଲୋକେ ବଞ୍ଚିବେ କେମିତି। ଲୋକଙ୍କ ପାଖରେ ଆଉ ଟଙ୍କା ନାହିଁ। ଆମେ ସ୍ଥିତିକୁ ଦେଖି ଉପଯୁକ୍ତ ପଦକ୍ଷେପ ନେବୁ ବୋଲି ଦିଦି କହିଛନ୍ତି।
