ଟାଇମ ମାଗାଜିନରେ ନାଁ ଆସିବା ପରେ ମୋଦିଙ୍କୁ ଶୁଭେଚ୍ଛା ଜଣାଇଲେ ଶାହିନ ବାଗ୍ ଦାଦି, କହିଲେ- ‘ପିଏମ୍ ମୋଦି ମୋ ପୁଅ’ l

ସତ୍ୟଶିକ୍ଷା (ନୂଆଦିଲ୍ଲୀ) ୨୫ .୦୯.୨୦୨୦ : ‘ଶାହିନ ବାଗ ଦାଦି’ ନାଁରେ ପରିଚିତ ବିଲକିସ୍ ବାନୋ ଟାଇମ ମାଗାଜିନର ବିଶ୍ୱର ୧୦୦ ଜଣ ପ୍ରଭାବଶାଳୀ ବ୍ୟକ୍ତିବିଶେଷଙ୍କ ସହ ସାମିଲ ହୋଇଛନ୍ତି । ଏ ନେଇ ସେ ନିଜର ଖୁସି ବ୍ୟକ୍ତ କରିଛନ୍ତି । ଏହା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନିଜ ପୁଅ ବୋଲି କହିଛନ୍ତି ।

ସିଏଏ ବିରୋଧରେ ବିରୋଧ ପ୍ରଦର୍ଶନ କରିବାରେ ମୁଖ୍ୟ ଭୂମିକା ଗ୍ରହଣ କରିଥିଲେ ୮୨ ବର୍ଷୀୟା ବାନୋ । ଟାଇମର ପ୍ରଭାବଶାଳୀ ବ୍ୟକ୍ତିବିଶେଷଙ୍କ ତାଲିକାରେ ମୋଦି ସାମିଲ ଥିବାରୁ ତାଙ୍କୁ ମଧ୍ୟ ସେ ଶୁଭେଚ୍ଛା ଜଣାଇଛନ୍ତି ।  ମୋଦିଙ୍କୁ ସେ ନିଜ ପୁଅ ବୋଲି କହିଛନ୍ତି । ତାଙ୍କୁ ଜନ୍ମ ଦେଇ ନ ଥିଲେ କ’ଣ ହେଲା ତାଙ୍କର ଜଣେ ଭଉଣୀ ତ ତାଙ୍କୁ  ଜନ୍ମ ଦେଇଛି । ଏହା ସହ ବାନୋ ମୋଦିଙ୍କ ଦୀର୍ଘ ଓ ନିରାମୟ ଜୀବନ କାମନା କରିଛନ୍ତି ।

ବାନୋ କେବଳ କୁରାନ ସରିଫକ ପଢ଼ିଛନ୍ତି । ସେ କେବେ​‌ ବି ସ୍କୁଲ ମାଟି ମାଡି ନାହାନ୍ତି । ୧୧ ବର୍ଷ ତଳୁ ବାନୋଙ୍କ ସ୍ୱାମୀଙ୍କ ପରଲୋକ ହୋଇଛି । ସେ ଏବେ ଶାହିନ୍ ବାଗରେ ଝିଅ-ଜୁଆଇଁ ଓ ନାତିନାତୁଣୀଙ୍କ ସହ ରହୁଛନ୍ତି । ଭାରତ କୋଭିଡ୍ ୧୯ ସହ ଲଢ଼ୁଛି ବୋଲି ପଚରାଯିବାରୁ ସେ କହିଛନ୍ତି ‘ଆମର ପ୍ରଥମ ଲଢ଼େଇ ହେଉଛି ଏହି ଭାଇରସ ବିରୋଧରେ । ଏହି ରୋଗ ବିଶ୍ୱରୁ ନିହାତି ଦୂର ହେବା କଥା ।’

ମୋଦିଙ୍କ ସମେତ ବିଶ୍ୱର ୧୦୦ ପ୍ରଭାବଶାଳୀ ବ୍ୟକ୍ତିବିଶେଷଙ୍କ ମଧ୍ୟରେ ବାନୋ ସାମିଲ ଥିବାରୁ ତାଙ୍କ ପରିବାର ଲୋକ ମଧ୍ୟ ବେଶ୍ ଖୁସି ଅଛନ୍ତି । ସୂଚନାଯୋଗ୍ୟ ଟାଇମ ମାଗାଜିନରେ ବିଲକିସ୍ ବାନୋ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଅଭିନେତା ଆୟୁଷ୍ମାନ ଖୁରାନା, ଜୀବବିଜ୍ଞାନୀ ରବୀନ୍ଦ୍ର ଗୁପ୍ତା, ଆଲଫାବେଟ୍ ସିଇଓ ସୁନ୍ଦର ପିଚାଇଙ୍କ ସମେତ ବହୁ ବିଶିଷ୍ଟ ବ୍ୟକ୍ତିଙ୍କୁ ସାମିଲ କରାଯାଇଛି ।